NaDoOoOoOoO

عودة

2009-05-21T21:38:00.005+03:00

العودة للحياة

هذا هو ما اشعر به الآن
لم يجد فى الحياة جديد بهيج ليحيل الايام القاتمة الى زهري فاتح

ولكن حقيقة تحول ايامي الى الرمادي هو ما دفعنى للتشبث
لم اكن ابدا هذا الشخص المنهك والمعتل داخليا
طالما آمنت باننى كائن ملون نابض بالحياة
ولكنى، وخلال العام الماضى، اكتشفت مدى ضعفي فى مواجهة الحزن

اعتقدت ان الايام كفيلة بمداواة الألم مثلما يقال،
و بمرور الوقت، بدلا من الشفاء، كانت تزداد الأمور سوءا
وبهذا تعلمت انه لا ينال الشفاء سوى من يسعي اليه

لا ادعى انني الآن فى احسن حالاتى
فأنا لست سوى روح تحاول الإفاقة من الغيبوبة
ومع ذلك، فإن السعي للإفاقة فى حد ذاته إنجاز، دليل على الرغبة فى الحياة
وحاليا، هذا يكفيني

اليوم، واخيرا، وجدتني اطرب باغاني الاسمر الجميل منير
بعدما كنت اسمعه فى ذهول الغير مدرك للمعاني والالحان
و استبدلت جملة "شجر اليمون دبلان على ارضه" ب"شبابيك، الدنيا كلها شبابيك"
اشعر بالحياة

قررت ان اغزو الرف الذى يحمل كتبا اشتريتها الشهور الماضية
ولم اكن حتى قد تصفحتها بعد

اجبرت نفسى على قراءة احدهم،
نعم "اجبرت" نفسى على القراءة

وبمرور الوقت، استعدت نهم القراءة
احسست بألفة شديدة وحنين جارف لرائحة الورق والحبر المطبوع
لملمس كتاب ممتع بين اصابعي

انهمار الكلمات والافكار بداخلي يجعلني عاجزة عن التعبير
ولكني على كل حال

اشعر بالحياة

2009-02-06T01:41:00.002+03:00

اعذرونى
فانا ذلك الهَرِم
الذى يحاول ان يتذكر طعم خطواته
بعدما كان يقطع الأرض عدواًَ

2008-04-12T19:59:00.000+03:00

تعلمت ان البكاء لا يحيى الموتى، ولا يعود بالزمن للخلف

ما بعد الإفاقة

2008-02-27T00:07:00.004+03:00

1- حاسة انى كبرت فى شهر اللى كان المفروض اكبره فى سنييييييييييين.
أُفاجأ بانه مطلوب منى اكون مُلِمة بحاجات و امور كتيرة و مختلفة، و انى المفروض اعتمد على نفسى و اتفطم فى الحال.

2- كانت اول مرة اصلح فيها حاجة فى الكهربا. و برغم انى كنت مرعوبة بس لبستلهم وش خشب و حسستهم كأنى متعودة عالحاجات دى. بس لا اراديا كده، افتكرت فى الحال منظر ابويا وهو بيظبط فى الاسلاك، عملت زيه، و عرفت اصلح اللى كنت بعمله.
اكتشفت ان كل حاجة عملها، حتى لو كانت عدت منغير ما اديها اهتمام، بس اكيد هى متخزنة جوايا.

3- من ضمن الذكريات الكتيرة اللى بقت تظهر فى دماغى زى فلاشر الكاميرا، افتكرت قد ايه كان ابويا موسوعة متنقلة. كان استحالة تقريبا اسأله عن حاجة و مايعرفش يجاوب، لدرجة انه كتير جدا كان بيبقى عندنا احساس قوى انه لو اشترك فى من سيربح المليون، اكيد اكيد هيكسب المليون.

4- لحد دلوقتى مش قادرة اضيف صفة مرحوم لإسمه.

5- بشكل او بآخر حاسة انه لسة موجود وسطينا..... بمعنى انى مش بفكر فيه من وجهة نظر انه مات... لأ، بحس انه مسافر فى سفرية من سفرياته للصعيد و راجع كمان اسبوع.

6- لم يكن ابى من النوع "الرغاي"، لذلك ماكنانش بيبقى فى بينا حوارات كتيرة و لكن ذلك لم يمنع احساسنا بحبه و خوفه علينا. إلا انه بعد ما دخلنا الجامعات، و بعد ما خلصنا من هم المدارس و الثانوية العامة، شوية بشوية احنا كبرنا و شوية بشوية اصبحنا اصدقاء.
و دلوقتى اقدر اقول انه كان صديقى قبل ما يكون ابويا.

7- إحساسنا بالألم انا و إخواتى خلانا نحِن على بعض. بعد ما كنا ناقر و نقير، اصبحنا قريبين من بعض، بنتبسط من مجرد وجودنا مع بعض، مابنحسش بالدفا غير لما نتلم كلنا ووقتها بس بنحس بوجود ابونا حوالينا.

8- واحشنى قوي. إتصرف بقى.. يا انت تجيلى .. يا انا اجيلك.

4 my dad

2008-01-23T22:14:00.001+03:00

Got a picture of you, I carry in my heart
Close my eyes to see it, when the night gets dark
Got a memory of you, I carry in my soul
Wrap it close around me, when the world gets cold

If you asked me how I'm doing
I'd say just fine
But the truth is, baby
If you could read my mind

Not a day goes by
That I don't think of you
After all this time
You're still with me it's true
Somehow you remain
Locked so deep inside
That baby, baby, oh, baby
Not a day goes by

I still wait for the phone
In the middle of the night
Thinking you might call me
If your dreams don't turn out right
And it still amazes me
That I lie here in the dark
Wishin' you were next to me
With your head against my heart

If you asked me how I'm doing
I'd say just fine
But the truth is, baby
If you could read my mind

Not a day goes by
That I don't think of you
After all this time
You're still with me it's true
Somehow you remain
Locked so deep inside
That baby, baby, oh, baby
Not a day goes by

Minutes turn to hours
And the hours to days
Seems it's been forever
That I felt this way

Not a day goes by
That I don't think of you
After all this time
You're still with me it's true
Somehow you remain
Locked so deep inside
That baby, baby, oh, baby
Not a day goes by
That I don't think of you

ذلك الرجل الرائع 2

2008-01-23T20:24:00.000+03:00

3)من ذكريات ما مضى، اذكر ان ابوي كانا بيكسل ينزل للحلاق
و لأنه كان جميل بيحب الجمال، كان بيحب دايما يعمل سكسوكة
و لما السكسوكة تطول، اقوله يا بابى روح اظبطها
يقولى هاتى المقص و ظبطيها انتى
و فعلا كنت بقوم بدور الحلاق
و كنت باستمتع جدا و انا حاضنة راسه و هو مستسلم فى ايدى كده
و كنت باتفنن فى التظبيطة، عشان مخليهوش يحتاج ينزل للحلاق تانى
و ياسلام بقى لما يبص فى المراية بإعجاب بعد ما حلق عندى
كانت بتبقى الفرحة و الفخر مالينى

4) زمان ايام ما كان ابويا بيشتغل فى شغله القديم
كنت بزوره كتير فى مكتبه بحكم انه كان قريب من مقر الكشافة بتاعتى
و كنت كل ما ادخل المكتب اسمع صحابه و زمايله يقولوله يا "كمون"
ايوة "كمون" اللى بيطحن و بيتحط على الاكل
كان عاجبنى قوى الاسم
بس عمرى ما فكرت اسأله ايه اصل التسمية دى
بس برضه يبقى السؤال
يا ترى يا هل ترى، يابويا يا غالى، كانوا بيقولولك كمون لييييييييييييييه؟

ذلك الرجل الرائع

2008-01-22T01:14:00.000+03:00

مممممممم
لا اراديا اصبحت الذكريات القديمة العتيقة تطفو على سطح تفكيرى
اعتقد انها محاولة من العقل الباطن لتجسيد صورة ابى الراحل امامى مرة اخرى
هكذا اذا
يرحل الناس ولا تبقى سوى الذكريات التى لا تسعفنا عندما نشتاق لحضن لمن رحل

اقول ايه ولا ايه عن ايامنا الهنية معاه؟

1) ابويا كانت دايما اجازته سبت و حد
و كان زمان و احنا صغيرين ياخدنا يفسحنا فى اماكن مميزة
اذكر فى يوم كان فى فيلم تسجيلى فى التلفزيون عن برج القاهرة
اتفرجنا عليه انا و اخواتى و عجبنا قوى
كانت عجبانا فكرة انك تحاول تشوف بيتك من النضارة المعظمة اللى فى البرج
الاسبوع اللى بعده كان اخدنا للبرج
و مع ان فكرة الخروج مع تلات عفاريت مقاريض فى ابتدائى كانت فكرة مرهقة جدا خاصة للرجال
بس هو عملها
و زورنا البرج
و كمان اتصورنا احنا الاربعة فى كل شبر فى البرج
كان من اجمل ايام حياتى اللى لسة فاكراها لحد دلوقتى

2) حوالى سنة 1996 جت لامى فرصة للسفر لفرنسا فى رحلة
و فى نفس الوقت ده كان ابويا رايح فى شغل لبلطيم
صعب عليه تضيع منها السفرية
قالها سافرى انت و انا هتصرف
و قد كان
سافرت هى فرنسا و سافر هو بلطيم
و اخدنا معاه
و بحسبة بسيطة كده نلاقى تقريبا ان فى الوقت ده كنا بنلعب فى سن 6-9 سنين كده
يعنى برضه عيال عفاريت مقاريض مش وقتهم خالص وسط الشغل
بس هو كان بيوفق بين الاتنين و كان بيستفيد من قدراتنا
يعنى مثلا كان فى مرة رايح يشترى ادوات للبيت اللى بيجهزوه تبع الشغل
فبدل ما ياخد معاه 3 عمال اخد 2 و اخدنا معاه
و خلانا نشيل معاهم الحاجات الخفيفة
و احنا كنا بنبقى مبسوطين قوى انه لينا لازمة فى المكان
نظام عبده المهم
و هناك اقدر اقول اننا قضينا احلى مصيف
و اتدلعنا اخر دلع
ده كان حتى باخدنا كل يوم نأجر عجل حاجة بتاعت ساعتين كده ناحية البحر
و طبعا الايس كيرم اللى من عالعربية ده كان اساسى
كنا بناكله من ورا امى ... فرصة بقى ماهى مسافرة

الله يرحمك يابويا... انسان عمره ما هيتعوض

-------------------------------------------

شكرا لكل من مر وعزانى

بجد حسيت ان لى اخوات كتير

ربنا يخليكوا لى كلكم

بس ياريت جميعا تدعوله

انتوا اه ماتعرفوهوش

بس بجد كان انسان اكتر من رائع

ملحوظة تانية

اللى عدا من هنا قبل كده هيلاقى ان كل البوستات القديمة اتشالت

وحاليا اصبحت المدونة مهداة الى روح ابى

مؤقتا لحد ما اتعايش مع الحدث

و شكرا للجميع

وداعا

2008-01-20T01:37:00.000+03:00

لم اكن اعبأ برياح الشتاء
و لكنى الآن اشعر بالبرد
بعد رحيلك
يا ابى
--------
رجاء، صلوا من اجله و ادعوا له بالرحمة

معادلة

2007-11-18T22:06:00.002+03:00

إذا كان الملايكة عايشين فى السما
و إذا كان الشياطين موجودين تحت الأرض
يبقى مفيش لا ملايكة ولا شياطين على الارض
فيه بشر
و البشر مش كلهم واحد
فيهم اللى بيبص للسما
و فيهم اللى بيبص للأرض

--------

شخبطة كانت فى بالى*

حريــــــــــــــــــــــــــــــــــــــــة

2007-10-26T13:36:00.001+03:00

فى الاول

الطير خايف يطير

إنما غريزة البقاء بتجبره يحرك جناحاته عشان مايوقعش و يموت

بيرفرف وهو مذعور

بعد دقائق بيكتشف انه عايش

و انه طاير

و انه بقى حر

Get this widget

Track details

eSnips Social DNA

-------------------------

اخيرا بتنفس

بدأت اشعر بالشهيق و الزفير داخل طالع جوايا

الحياة رجعت تدب

I still exist و اكتشفت انى

2007-10-10T17:18:00.001+03:00

لحد وقت قريب
كنت حاسة انى ملكة زمانى
و انى عايشة عيشة ملوكى آخر دلع
مش عاتلة هم حاجة بتاتا اطلاقا ابزولولتى
مرتبى باخده اول كل شهر بالرغم انى لا شغلة ولا مشغلة
كل اللى بعمله انى بذاكر و بس
بالعربى كده عايشة على حساب الغير
عادى... سنة الحياة

مؤخرا
قاعدة فى حالى لا بى ولا على
لقيت تليفون جالى من احدى صديكاتى بتقولى
باركيلى يا نادو..... انا هتخطبببببببببببببببببببببببب
بعدها بكام يوم
قابلت واحد من شركاء الكفاح القدماء
مش تقوليلى مبروك يا نادووووو .... انا اتوظفت فى شركة كويسة
كام يوم و اسمع ان مش عارفة مين خلفت
و مين خطب
و مين هاجر
........

ايه ده
هى الايام بتجرى؟
ولا انا اللى مش قادرة احصل الزمن؟
هو انا ليه لسة جوايا احساس الطفلة؟
هو انا امتى كبرت كده؟

إحياء الحياة

2007-10-04T21:28:00.001+03:00

الانسان

تواجهه مخاوف،

فيقرر ان يبتعد عنها و يهرب

و يصبح سجين فى داخله

خائف من مواجهة ما يسميه " المنطقة المظلمة فى حياته"

يوهم نفسه انه بتاجهله هذا يكون قد تخلص من ذلك الأسود القابع فى نفسه

لكنه فى حقيقة الامور يزيد من رصيد مخاوفه

و يتقيد برباط خفى صنعه بيديه

إلى ان يأتى يوم يختنق فيه

بعد كثير من الركض خوفا من شئ اصبح مع الوقت غير واضح

فيتوقف

و فى لحظة شجاعة، او قل جنونا

يقرر ان يقف و ينظر خلفه ليرى ذلك الشئ الذى ظل يجرى مبتعدا عنه لوقت طويل

و إذ به يفاجاء ان مخاوفه تلك ليست بذلك الحجم الذى كان يتخيله

و ان العناء و التعب اللذان بذلهما فى الهروب كان يمكن تكريسهما فى المواجهة

و هنا تتكشف الحقائق

اننا عبيد اوهامنا إذا انصعنا لها

2007-09-12T20:12:00.001+03:00

طول عمرى عارفة انه بيحبنى
طبعا... مش ابويا
ماكانش جابنى الدنيا لو مكانش بيحبنى
و اعتقد ان دى هى إحدى الحقائق اللى بنبقى عارفينها و منغير ما نذكرها كتير
فبتصبح من المسلمات فى حياتنا
او بتصبح حاجة عادية مش حاسين بقيمتها ولا حاسين بيها
........
ماكانتش اول مرة اللى اغيب فيها كل الوقت ده عن البيت
عن ابويا و امى و العيلة
بس كانت اول مرة نتكلم انا و ابويا بهذا الشكل الحميمى
و كلمة بسيطة منه
وحشتينى يا دندن
كانت كفيلة بإنعاش روح
و كانت كفيلة بتذكيرى بكل افعاله الجميلة

طول عمرى عارفة انه بيحبنى اكتر من نفسه
حتى دون ان يذكر ذلك، فحبه لى عملى
يقوم يصحينى الصبح عشان الجامعة
يحضر لكل من فى البيت الفطار كل يوم منغير تأفف
مكالمات وسط النهار لزوم الإطمئنان على الأبناء
حرص انه يجى كل يوم فى ميعاد ثابت عشان يلمنا حواليه على السفرة
و ما إلى ذلك من باقى سيناريو يومى
كنت وصلت لمرحلة انى قربت انسى كل النعم دى
و كنت وصلت لمرحلة انى اشوف الحاجات دى حاجات عادية...من واجباته
بس كلمته البسيطة دى فتحت عينى تانى

حكاوى عالماشى

2007-09-03T13:00:00.001+03:00

بحب اتنين سواااااااااااااا يا هنايا فى حبهممممممممممممم

و بحب اتنين سوااااااااااااااا يا هنايا فى حبهممممممممممممم

الميه و الهوا طول عمرى جمبهمممممممم

ازيكوا جميعا

وحشتونى قويييييييييييي زوارى الأعزاء

معلش استندلت عليكوا و سبتكوا لحر القاهرة و رحت انا مطروح

مش قادرة احكيلكوا قد ايه الواحد كان بيتكتك مالبرد بالليل

ولا الصبح، هوا عالبحر يطيرك

الا صحيح هى الحرارة فى القاهرة فعلا وصلت لل40 درجة؟

هههههههههههه

طبعا انا لا بغيظكوا ولا حاجة

لا ضغينة

اما حصلى هناك حتة موقف

تعالوا اما احكيلكوا

احنا كنا سافرنا مع العيلة

و كل واحد طبعا كان جاى بمراته و عياله

فكان عندنا ثروة طفولية هايلة... ولاد خالى على ولاد خالتى على اخواتى

على عيال الناس اللى فى القرية

انا قلت يا بت يا دندن نستغل دوشة العيال دى فى ايييييه؟ فى اييييييه؟؟؟

بس

مفيش غير نعمل ماتش كورة كبييييير

و عنها، رحت جمعت كل العيال الصغيرة اللى فى المصيف و عملنا فريق، و الكبار مع بعض فى فريق

و حيث انى اكبر العيال اللى فى فريقى فكنت انا الكابتن

و ابتدى الماتش

و العيال يباصولى

و انا اشوووووووووووووووووط

و فى مرة....جاتلى الكورة..... و بينى و بين المرمى بتاع مترين

رحت ظبطت الكاب على دماغى، نزلتها على عينى بحيث انى ماشوفش غير الكورة و هى بتدخل الجون

مكدبتش خبر

و اندمجت فى الماتش ولا كأنى فى كاس العالم

رحت جريت بالكورة ناحية الجون

و خير اللهم اجعله خير

لقيتنى بطييييييييييييييييييييير لورا و وقعت عالأرض

اى نعم انا كان كل حتة فى وجعانى، بس كنت مذبهلة

لقيت شوية العيال من فريقنا جريوا زى الجراد يدوروا على امى و ابويا

و الباقى كان فوقيا

و انا عايزة اقوووووووووووووم

شيلوا العيال دى من هنا

المهم، فييييييين بقى لما عرفت ان سيادتى اندمجت جدا فى الماتش لدرجة انى رشقت فى العارضة

كان شكلى وحشششششششششششششششششش

فإلى جانب البقليلة اللى طلعتلى فى نافوخى، و مناخيرى اللى اتلوحت، و شفتى اللى اتفتحت، و سنانى اللى اتلخلخت

بعيد عن ككككككككككككككككككلللللللللللللل ده

سمعتلى شوية كلام من اللى اعرفهم و ماللى ماعرفهمش:

هو انت ناقصة، كل سنة تطلعيلنا بإصابات....مش تخلى بالك بقى انت مبقتيش صغيرة.....يا بنتى بطلى جنان بقى عندك عشرين سنة و لسه معقلتيش

و كلام كلام كلااااااااااااااام

و انا وسط كل ده

رحت سألت عيال الفريق

هو احنا جبنا جون؟؟؟؟

و لقيتلك كلللللللللللللل اللى كان واقف تنح، و بعدين قعدوا يضحكوا

و اطمئنوا انى بخير و مفيش فى حاجة و انى لسه بجناجى

و شوية كده، اتسحبت من ورا امى و ابويا و خدت العيال و رحت دخلت جول

جووووووووووووووووووووووووووووووووووووووول

و كسبنااااااااااااااااااا

هيييييييييييييييييييييييييييييييييييييييه

ضجيج

2007-08-19T19:39:00.001+03:00

و الناس فى الشارع يتهامسون... يتحادثون ... يتضاحكون ... و يتشاجرون
ابواق السيارات من كل اتجاه تصرخ هى الأخرى
و الإنارة الحادة المبهرة تساهم بقدر لا بأس به، فيصنع الكل لحنا شاذا لأوركسترا تعزف ألحانا متناقضة
تحتضن رأسها براحتيها كأنما تحميها من آثار ضوضاء لامفر منه
و تقرر ان تهرب من الضوضاء .... تجرى خارج الشرفة و تسرع بغلقها
و تقف برهة تلتقط هدوئها فى بعض من الجو الصامت
و تتأملهم من خلف الزجاج، الناس و الأنوار و السيارات
و تذهب بذهنها بعيدا
و يتعالى صوت ضجيج من نوع آخر، ضجيج داخلى لايمكن إسكاته، آخذا فى التصاعد كالبركان الذى يستد للإنفجار، مرسلا رسائل من دخان و حمم
تدرك انه لا فائدة، إن ظلت لحالها هكذا،فى هذا الهدوء طويلا، حتما سينفجر البركان الذى كثيرا ما سعت لإخماده
و تدرك ان ضجيج خارجى ارحم بكثير من ضجيج داخلى لا يهدأ
فما هى دقائق إلا و كانت تهرع باتجاه الشرفة لتفتحها على مصراعيها، تحاول الهرب من شئ يعيش داخلها

!!!!!!!!!!!!

2007-08-19T19:23:00.001+03:00

مريت بفترة ماكنتش قادرة اكتب فيها ولا حتى قادرة افتح البلوج
مش عارفة
ماكنتش قادرة اعبر عن نفسى او اكتب اللى جوايا
مش إكتئاب ولا حاجة
بس هو يمكن بسبب انه حاجات كتير كانت بتحصل حوالى بسرعة و ماكنتش قادرة استوعبها
فكنت عاملة زى اللى بيشوف بس منغير ما يبصر
او اللى بيسمع منغير ما يستمع
او اللى بيدوق منغير ما يتذوق
و كنت كل ما ادخل البلوج، اكون ماليانة كلام، احط ايدى عالكيبورد الكلام ينفض
إحساس وحش
معلش
فترات و بتعدى
و اهه كله بيطلع فى الغسيل :)
تحياتى

نزلة حب

2007-07-23T21:47:00.001+03:00

احيانا
و دون ان ندرى، و الأيام تمر فى ملل و رتابة
يتخلى القلب عن كهفه الهادئ
و يخرج فى براءة طفل يحاول الإمساك بشعاع الشمس
فإذ به يأتى ، منكس الرأس دامع العين
ككثير من الأطفال عندما يدركون انهم إرتكبوا خطأ ما رغما عنهم
يأتى قائلا: آسف، لقد اصبت بنزلة حب
فيجرى العقل كالأم الملهوف بحثا عن علاج
و لكن عجبا
اجد القلب فرحا، متقبلا مرضه، بل و يرفض الدواء
و ما بيد العقل حيلة
فمهما نهت الأم صغيرها عن اللعب باعواد الثقاب، فهو لا يتعلم إلا عندما يذق نيرانها
و على هذا الأساس
يتصرف القلب كما يحلو له، منساقا خلف سراب، حتى يأتى اليوم الذى يدرك فيه....... مدى خطؤه

حدث فى مثل هذا اليوم11/7

2007-07-11T01:01:00.001+03:00

1536
توفي العالم الهولندي ايرازموس المولود عام 1466 ، والذي ترك الكثير من الكتب المتنوعة . وكان داعية للجدل والحوار في مختلف القضايا دون تمييز ، وقد نشر ( العهد الجديد ) باللاتينية .

1767
مولد جون كوينسي آدامز (توفي عام 1848) وهو الرئيس السادس للولايات المتحدة، وهو ابن الرئيس الأمريكي الثاني جون آدامز (1735 - 1826).

1789
- قدم «لافاييت» مشروع إعلان حقوق الإنسان وسط بوادر الثورة الفرنسية.

1849
- مولد الإمام الشيخ محمد عبده بالبحيرة، وتوفي في نفس اليوم عام 1905.

1882
- بدأ الأسطول البريطاني في ضرب الإسكندرية تمهيدا لاحتلال مصر.

1921
ثورة الشعب في منغوليا أدت إلى استقلالها عن الصين .

1934

ولادة جورجيو أرماني .

1936
وقعت النمسا بزعامة المستشار كورت ون شوشنغ، وألمانيا بزعامة أدولف هتلر معاهدة للوحدة بينهما.

1960
إعلان دستور تشيكوسلوفاكيا .

1963
وقع انقلاب عسكري في الإكوادور ضد الرئيس أروزمينا .

1964
أطلق قمران ضمن سلسلة أقمار إلكترون ، وكان الهدف منهما إجراء قياسات للأحزمة الإشعاعية حول الأرض .

1979
- سقوط معمل الفضاء الأميركي «سكاي لاب» الذي أطلق في عام 1973.

1991
- حدث كسوف تام للشمس وشوهد في أواسط المحيط الهادي وأمريكا الجنوبية .
- اجتاحت فيضانات الصين وأسفرت عن مقتل 1700 شخص, وتشريد أكثر من مليون آخرين.

1993

كانت زيارة مسؤول فيتنامي رفيع المستوى لأول مرة لإسرائيل منذ 47 عاماً

----------------------

طبعا الجميع يتساءلون ايه حكاية جرعة المعلومات الفجائية دى النهاردة

ههههههههههههه

منغير ما توجعوا دماغكوا و تفكروا كتير

ببساطة شديدة

1987

انا اتولدت

إستيقاظ متأخر

2007-07-05T20:33:00.001+03:00

لم تكن يوما "واقعية مع نفسها"
نعم
تعترف بذلك
لم تكن نظرتها للحقائق نظرة مثالية تضع الأشياء فى مكانها الحقيقى و تعطيها حجمها الصحيح
بل كانت نظرتها تترنح بين التهويل و الإستخفاف و ذلك تبعا لحالتها النفسية و المزاجية
تعترف بذلك
و تعترف انها بسبب تلك اللاواقعية، سقطت فى كثير من المآزق التى كان من الممكن تلافيها
و البعض منها مستمر حتى الآن

لذلك كانت كثيرا ما تصطدم مع من حولها، صارخة من داخلها متساءلة
كيف لا ترون ما أرى؟
فى حين انه كان يجب عليها ان تصرخ لنفسها: كيف لا أرى ما يرون؟
ااااااااااااااه

لم تتعمد يوما ان تكذب على نفسها، لكنها كانت تخاف الإرتطام بالواقع، لذلك كانت تنفيه متشبهة بنعام يدفن رأسه فى الرمل ظاناً انه بذلك قد اختباء.
حزينة هى على تلك السنوات، و كل تلك الفرص التى اضاعتها بيديها

"يعيش المعلم و يفضل يتعلم"
افاقت مؤخرا، هزة قوية دفعتها لإعادة تقييم حياتها
و صعقت عندما إكتشفت انها كل تلك السنوات كانت تكذب على نفسها بغير قصد

"اللى فات مات و إحنا ولاد النهاردة"
مرحلة جديدة و فكر جديد(مالوش دعوة بفكر الحزب الوطنى) بدأت تحاول تطبيقهم، و ها هى تخوض اولى تجارب المرحلة الجديدة محاولة إصلاح ما اتلفته قبلاً
الآن بدأت تشعر بالراحة

(ما اقسى ان نكذب على انفسنا ظانين اننا نحميها، فنحن بهذا لا نجرح أحداً سوانا

-----------------

تحديث:

الكلام اللى مكتوب فى البوست ده خلانى افتكر فيلم بحبه قوى، فكرنى بالشيخ حسنى فى فيلم الكيت كات
الشيخ الضرير اللى ماكانش عايز يصدق انه ضرير؛ ساق الموتوسيكل، جدف فى النيل..... و حاجات تانية كتير وقعته فى مشاكل
و كلللللللللللللل ده عشان مكانش عايز يصدق ان عنده مشكلة

بس كلام جه فى بالى قلت اكتبه
سلام :)

حفلة الأورماااااااااااااااااااااااااااااااان

2007-06-20T21:33:00.001+03:00

احم احم
السادة المشاهدين
جاءنا البيان التالى

بكرة الخميس الموافق 21\6 هيكون فى حفلة فى حديقة الأورمان
بمناسبة يوم الموسيقى العالمى
هيكون فيها فرق جامدة قوى زى
وسط البلد
إفتكاسات
Sahara
Black Theama
The Riff Band
Screwdriver

الحفلة من 7 مساء حتى 1 صباحا
و التذاكر هتكون متاحة على الباب، التذكرة ب10 جنيه
اكيد هتبقى حفلة جامدة جدااااااااا
ياريت اشوفكم كلكم هناك
(اللى مش عارف مكان الحديقة
ياخد المترو و ينزل فى محطة الدقى
و يسأل عن حديقة الأورمان
دشليون مين يدله)

يلا اشوفكم هناك
إلى اللقااااااااااااااااااااااء

حالة وحدة

2007-06-16T00:24:00.001+03:00

ابحث فى داخلى
عن شرنقة
خيوطها من حديد
محكمة الغلق
تحتوينى
و اعيش فيها
كدودة هادئة مسالة مستسلمة
و اصبح مجرد كائن حى يعيش فى شرنقة مثبتة على غصن ذابل الأورلق
دودة فى شرنقة بلا عنوان
بلا إسم
و بلا هوية
منسية
ناسية العالم من حولها
بما فيه من صخب و ضجيج
و مساحات شاسعة ليس لها مكان فيه
تعيش فى شرنقة مهملة فى مكان عال
ل يطالها من الضجيج شئ
مستمتعة بهدوء و وحدة و سكينة
دودة تعيش فى مملكة
يراها العالم مجرد شرنقة

شر لابد منه

2007-05-20T22:06:00.001+03:00

إستعنا عالشقا بالله
و هنبتدى خناقات... قصدى إمتحانات من الحد اللى جاى
أمانة عليكوا يا جميع الزائرين
العاملين منكم و الدارسين
ياللى عدى عالتعليم الجامعى الحكومى و لسة عايش
إدعولى
لأ
إدعوا للطلبة الغلابة
إدعوا لإخوانكم فى الأسر
البشرية المعذبة فى السجون الحكومية اللى كان إسمها الجامعات سابقا
ناخد برأة او حتى إفراج
أى حااااجة
بس نخلص على خير

هحاول أخش الكهف و ألم نفسى و أذاكر عدل
عشان دعواتكم تجيب مفعول
مانا لازم اجى على نفسى و احاول افهم المنهج بيتكلم عن ايه

يلا
معلش
مسيرى اطلع من عنق الزجاجة
وفى يوم من الأيام اخلص جامعة
و ابقى فرحة امى و ابويا
عاطلة قد الدنياااااا
نياهاهاااااااااااااااااااااااااااااا

تحياتى للجميع

2007-05-20T11:36:00.001+03:00

إستعنا عالشقا بالله
و هبتدى إمتحانات من الأسبوع الجاى
إدعوا لى ياخوانا
انا و كل اللى زيى من بائسى المصير المحكوم عليهم فى الجامعات الحكومية
نعدى على خير
و ناخد إفراج
ياااااااااااااااا رب

مافيش اسهل من كده

2007-05-03T00:08:00.001+03:00

عاوز تموت شهيد ؟
ياتركب طياره............... ياتركب عباره

عاوز تموت م الجوع ؟
ياتشترى شقه................ياتشترى عربيه بالقسط

عاوز تموت م الحسره ؟
ياتتفرج ع الفاترينات فى ستى ستارز.....ياتروح زياره لمارينا

عاوز تموت م الغيظ ؟
ياتتفرج ع القنوات المحليه......... ياتتفرج ع النشره الجويه

عاوز تموت م الزهق ؟
ياتستنى الأشاره لما تفتح .... ياتستنى دورك فى الطابور فى
التأمين الصحى

عاوز تموت م الهبل ؟
يا تخش ع النت .......... ياتسمع نجوم الأف أم

عاوز تموت مخنوق ؟
ياتروح مصلحه حكوميه ......... ياتقرا الجريده اليومية

عاوز تموت مفروووس ؟
ياتركب تاكسى ............ ياتركب دش

عاوز تموت مرعوووووب ؟

ياتستنى نتيجه الثانويه العامه ....... ياتستنى نتيجه التحاليل عند الدكتور

عاوز تموت مشهور ؟

ياتتجوز رقاصه ............ ياتنصب على بنك

عاوز تموت مليونير ؟

ياتعمل فيديو كليب............. ياتلعب كوره

عاوز تموت ورا الشمس ؟
ياتشغل مخك ............ ياتفتح بؤك

عاوز تموت منكد ؟
ياترشح نفسك فى الأنتخابات ....... ياتخش ف أتفاقيه الجات

عاوز تموت م الحزن ؟
ياتفكر دايما ف أحوالك .......... ياتحط الحكومه ف بالك

عاوز تموت م الضحك ؟
ياتتجوز أتنين ......... ياتشتغل مع المجانين

عاوز تموت ف حالك ؟

أعمل نفسك دايما مش واخد بالك
-----------------------
تحديث نسيت اكتبه فى البوست
الكلام ده منقول من ميل وصلنى و عجبنى قوى

ميه مقطوعة

2007-04-21T13:17:00.001+03:00

انا مبسوطة
حقيقى مبسوطة
هطير من الإمبساط
حد يسألنى ليه
اقولكوا ليه
عشان ربنا ادانى حكومة مالهاش زى
فاكرينى بتريق
لا والله بتكلم جد
ده انا هدعيلهم
اله ياااارب تدى الصحة لظيفة هو و اسديكائه الأنتيخ اللى معاه فى الوزارة
برضه مش مصدقيننى
طب انا هحكيلكوا الحكاية و انتوا احكموا بنفسكم

امبارح الميه اتقطعت
ببساطة شديدة جيت الصبح اول ما صحيت افتح الحنفية لقيتها مش راضية تنزل حتى سرسوب
فضلت قاعدة منتظرة بحسرة يمكن نقطة تنزل كده و لا كده
أبداااااااااا
ابزولولتى
و ادينا اهه يوم السبت و برضه مفيش ميه
يعنى بحسبة بسيطة كده نقدر نقول انى داخلة على ال48 ساعة منغير ميه
طبعا كلكوا مستغربين ايه علاقة الكلام اللى فى اول الموضوع بحوار المية المقطوعة
اقولكوا
حكاية قطع المية دى عملية مقصودة و محسوبة بدقة كمان
و انما تنم عن تفكير ثاقب و رؤية مستقبلية واضحة و تخطيط تكتيكى متمكن من قبل الحكومة
و حياتكوا عندى ما بتريق
ياخوانا فتحوا عينيكم شوية عالحقيقة
اهه انتوا يا مصريين كده
تبصوا على نص الكباية الفاضى و ماتبصوش عالمليان
الحكومة كان ليها هدف معين وراء قطع المياه عن منطقة كاملة و اللى اتشرف بالسكن فيها
الحكومة (اله يا رب يخليها لينا) كانت عايزة تمرنا على حياة الصحرا
إفرض كده مثلا و انت ماشى فى امان الله تهت لاسمح الله و لقيت نفسك خير اللهم اجعله خير فى صحرا
تقدر تقوللى هتعمل ايه حضرتك؟؟
هتتصرف ازاى؟؟؟
خصوصا و انت حياتك كلها رفاهية و ترف و عمال تبعتر فى المية يمين و شمال
و كل شوية تستحمى و تغسل هدومك و تهدر فى المية بالشكل الفزيع ده
تقدر تقولى و انت انسان فافى كده لو تهت فى صحرا هتعمل ايه؟
طبعا مش عارف
و ده نتيجة التسيب و اللامبالاه اللى إحنا عايشينها
عشان كده ماما الحكومة قررت تقطع عنا الميه عشان نتعلم ننشف شوية و نواجه المواقف الصعبة دى و يوم ما نقع فى ضيقة ندعيلها بدل ما ندعى عليها
شفتوا بقى قلب الأم؟؟؟
كمان
الحكومة كان ليها هدف تانى أسمى كمان وراء قطع الميه
مثلا
قوللى
انت فى العادى
لو خالتك او عمتك ساكنة بعيد عنك... معدل زيارتك ليها بيبقى كام مرة فى السنة.؟؟؟؟
بلاااااش
كام مرة فى الشهر؟؟؟
اللى انتوا ماتعرفوهوش بقى
ان لو الميه اتقطعت عندك فى البيت
زى ماهى مقطوعة عندنا كده
هتبقى مضطر تنزل تزور قرايبك كلهم
و ده كان احد اهداف الحكومة برضه
إعادة إحياء الروابط و العلاقات العائلية اللى اندثرت برضه نتيجة الرفاهية التى يرفل فيها المواطن المصرى
واحد بيسأل ايه اللى جاب الزيارات فى موضوعنا
اقولك يا سيدى
تقدر تقوللى لو عندك جامعة و عايز تنزل و حاسس نفسك ريحتك مش ولابد هتعمل ايه؟
ماهو مالهاش غير حل من اتنين
يا تنزل الجامعة بالبرفان الطبيعى اللى انت حاطه
يا تيجى على نفسك و تضربلك مشوار لعمتك اللى ساكنة فى النصف الآخر من الكرة الأرضية عشان تسلك أمورك و تأجر الحمام عندها
و بكده تكون اتعلمت درس كبيييييير جدا انك لازم تقوى الروابط العائلية
و ماتخليش النعيم اللى انت عايش فيه ده يبعدك عن اهلك

اما بقى عن الهدف التالت اللى
فهو انك تتعود تتعايش تحت اى ظروف
يعنى مثلا
تخيل معايا كده
لو الميه اتقطعت فجأة من البيت
هيترتب على ده ايييييييييه؟؟
طبعا اول حاجة مفيش حمام
مفيش أكل
مفيش هدوم نضيفة
مفيش غسيل
بمعنى أدق هيصيب البيت شلل تام لكل مظاهر الحياة
و انت بقى استغل الفرصه دى
و حاول تطبيق الهدف اللى الحكومة كانت عايزاك تجربه
عيش كأنك مش عايش
و تعايش مع الوضع اللى مافيهوش عيشة ده
يعنى البس التيشرت اليتيمة اللى فى الدولاب
و خليك بالبنطلون اللى كان عالحبل يادوب دقايق قبل إطلاق التجربة
و انزل دورلك على مطعم تاكل منه
ده إذا لقيت اصلا محلات ولا حتى افران شغاله حيث ان الميه مقطوعه عن المنطقى كلها
و بهذا الشكل
هتطبق مثل الحاجة ام الإختراع
و هتلاقى نفسك كده الأفكار عمالة تنهمر على نافوخك
و تصبح من المبتكرين و المخترعين
و كل ده عشان انت ولد مطيع بتسمع كلام الحكومة اللى دايما عايزة مصلحتك

أعتقد بعد ما شرحتلكوا الوضع كلكم بتحسدونى على التجربة المثيرة اللى خصت بها الحكومة منطقتى العزيزة
بس احب اطمنكوا
كل واحد هيعيش اليومين دول
كله بالدور
و تجربة المية المقطوعة سيتم تطبيقها فى جميع ربوع مصر قبل حلول عام 2010
و على الراغبين فى تكرار التجربة التقدم بطلب الى أونكل ظيفة بعد تقديم ما يثبت خضوعه لجميع الظروفة
و خلوه من أمراض الجرب و القمل و الذى منه

اسيبكم بقى عشان رايحة زيارة لخالتى اللى فى الفيوم

إعتذار

2007-04-20T20:58:00.001+03:00

أولا بتأسف جداااااااااااا لكل من مر من هنا و لم يجد جديد
و بشكر كل من سأل عنى

معلش بقالى فترة غايبة لظروف الدراسة و الإمتحانات و تقديم المشروعات و الذى منه

كمان
بصراحة يعنى
بقيت كل ما ادخل البلوج يجيلى إكتئاب
يعنى الخلفية المستردة دى و البنى فى البيج بقى شكلهم على بعض مش عاطفى بالمرة
و بقيت حاسة إن البلوج ده عامل زى البيت الصغير اللى ماليان كركبة
بيت زى ده لازم اوضبه قبل ما اقعد فيه

و بقالى فترة بدور على تمبلت مناسبة للمكان
عشان اتعلم اعمل تمبلت بنفسىxml و css و وصل بى الحال انى احمل كتب من على النت عشان اتعلم ال
يعنى الحكاية فتحت فتوحة جامدة مالهاش آخر
خصوصا و انا ابيض يا فل فى التصميم و الكلام ده
يعنى عاملة زى بتوع نحو الأمية
(ياريت يا جدعان اللى عنده معلومتين حلوين كده مايبخلش بيهم علينا)

عموما
إنشاءالله فى القريب العاجل هيتم التجديد و التوضيب
و هرجع اعمل دوشة فى المنطقة
(مش ناسية يا ابراهيم البوست اللى ليك فى ذمتى عن اول مواليد مجموعة مغامير الادبية
و مش ناسية يا بيسو التاج اللى عايز مخمخة و روقان بال)

اه صحيح
سلام مخصوص ليك يا راسبوتين و ليك يا بيشوى
شكرا ليكم عالسؤال
و اشوفكم قريب
سلامى للجميييييييييييييييييييع

مصدومة

2007-03-27T14:34:00.001+03:00

خبر صغير نشر فى آخر صفحة فى المصرى اليوم بتاريخ 07-3-26
الخبر ببساطة بيقول التالى:

عمال المعاش المبكر فى الترسانة البحرية يحتجون على إهذار حقوقهم بتأييد التعديلات

«٢٥٠» من عمال المعاش المبكر البالغ عددهم «٣٥٠٠»، نظموا تظاهرة أمس أمام مبني الترسانة البحرية في الإسكندرية، احتجاجاً علي عدم تنفيذ حكم هيئة التحكيم، رقم ٣ لسنة ٢٠٠١ عمال، كلي من محكمة استئناف الإسكندرية بأحقيتهم في ضم العلاوات المقررة، واحتساب المقابل النقدي لبدل طبيعة العمل، منسوباً إلي أجورهم الأساسية بعد زيادة هذه العلاوات المضمومة منذ ١/١١/١٩٩٢، وفي الوقت ذاته، رفع المتظاهرون لافتات تأييد للتعديلات الدستورية.

يقول عثمان حواش عامل بورشة (١): إن رئيس مجلس الإدارة طعن علي الحكم بالنقض برقم ٢٢١٣/٢٣٥٣ لوقف تنفيذ الحكم بصفة مستعجلة، ولم ينفذ من الحكم إلا «العشر».
......

العجيب في الأمر أن المتظاهرين رفعوا لافتات تؤيد التعديلات الدستورية الجديدة، بدلاً من اللافتات التي تعبر عن مطالبهم، التي تظاهروا من أجلها.

------------

و على كده انتهى الخبر

بقدر ماهو بقى عادى جدا اننا نشوف عمال بيتظاهروا عشان ياخدوا على حقوقهم

بقدر ما أفزعتنى الطريقة اللى تظاهر بيها عمال الترسانة

للأسف ماقدرش الومهم

و بالرغم من إنه بقى عادى انك تسمع ان الحزب الوطنى بيدى خدمات و مكافئات للى يسمع الكلام

بس التصريح بالخضوع و الخنوع بالشكل الفج ده عشان بس الواحد ياخد حقوقه ده اللى مصيبة

و اعتقد انه هتظهر كثير من المظاهرات المؤيدة لناس عايزة تاخد حقوقها

و برضه مانقدرش نلومهم

و زى ما بيشوى قال

"الشعب المصري كله مزنوق ف أول درجة من درجات الهرم
يعني كله بيدور علي الأكل واللبس والسكن
كله مزنوق ومحدش عارف يطلع لفوق
الوضع ده مقصود ومجاش بالصدفة"

و ده حقيقى

بس للأسف

دى لوزة مقشرة يهديها الشعب للنظام الحاكم

مستعدين نعمل اى حاجة و نوافق على كل طلباتكم

بس أدونا حقوقنا اله ما يوقعكم فى ضيقة

خلص الكلام.

إستفتاء

2007-03-23T19:28:00.001+03:00

ميعاد الإستفتاء على التعديلات الدستورية هيكون يوم 26/3/07
طب ممكن سؤال؟
هل المفروض اننا نروح الإستفتاء و نرفض التعديلات
ولا نقاطع الإستفتاء من اساسه؟؟؟
ايهم اجدى؟؟؟؟؟

مجرد رأى... عن الفيلم الإسرائيلى

2007-03-20T20:00:00.001+03:00

بصراحة انا كنت واخدة فترة كده اجازة من التدوين
بس حبيت النهاردة اقول رأيى فى موضوع مهم

من فترة ليست ببعيدة اثير موضوع الفيلم اللى عرضته إسرائيل, و اللى فيه مشاهد لتعذيب أسرى حرب مصريين بعد حرب اكتوبر 73
و طبعا صاحب عرض هذا الفيلم كثير من صرخات الغضب و الحنق فى "الشارع المصرى" و ليست الحكومة المصرية
بل ان الثورة على إسرائيل و على بن اليعازر كانت معها ثورة و غضب على الحكومة ذاتها
طب ناخد الموضوع من الأول
دلوقتى إسرائيل هى اللى عرضت الفيلم, بمعنى آخر المجرم فضح نفسه
طب هى عملت كده ليييييه؟ و اشمعنى اليومين دول بالذات؟؟؟
الفترة اللى اتعرض فيها الفيلم اتميزت بأحداث كتيرة مهمة
منها
1- حرب إسرائيل فى لبنان, و فشلها المزرى امام الشعب و الإرادة اللبنانية
2- الإنتهاكات و التخريب فى المسجد الأقصى, واللى بسببه كثير من الهيئات وقفت ضدها فى مصر و العالم

كمان مش لازم نغفل حاجة مهمة جدا
و هو إن على مدار تاريخ مصر, و تاريخ ما تعرضت له من إساءات من بعض الدول
فرد مصر بيكون واحد و مكرر فى جميع المواقف
نقعد نزعق, و نلاقى وزير يقول هنبحث فى الموضوع ده, و مش هنقبل المساس بسمعة المصريين , و مش هنسكت... و كلام كتير كده
و هوباااااااااااااااا
الموضوع ينام
و يبقى مجرد إضافة جديدة فى ليستة الإهانات فى شهادة مصر

ممكن تكون إسرائيل عايزة تستغل النقطة دى, تقوم تذيع الشريط عشان توقعنا فى الشرك
و هى عارفة فى الآخر اننا مش هنعمل حاجة
بس هى هتكون اثبتت لنفسها انها برضه الأقوى, و الأشرس

يمكن كمان تكون بتلهينا
و محضرة لنا مفاجئة قريب

أى إن كان السبب
طبعا دماء الجنود و تمن ارواحهم لا غبار عليها
و أكيد الفيلم لازم ناخده بجدية اكبر من كده
بس برضه لازم نفهم ايه اللى ورا الفيلم
إسرائيل دولة ماكرة, مش بتعمل الحاجة كده و السلام
و أحنا كمان محتاجين تكون مواقفنا اكثر رجولة و حزم
و نحترم انفسنا عشان يحترمنا الآخرون

عموما ده رأيى الشخصى
يحتمل الصحة و الخطأ
اضغط هنا

فى كافيه الإبداع... و قعدة ماتتعوضش

2007-03-10T01:39:00.001+03:00

ياااااااااااااااااااااااااااه
اخيرا شفتهم
و على قد ما كنت خايفة
متوترة
و محرجة من انى اجى
بس بعد كده
فرحت بالناس اللى قابلتهم
و ناس كتير منهم كنت اعرفهم من خلال التدوينات
عرفتهم على الطبيعة
شخصيات من ارقى ما يكون
و بجد كانت قعدة جميييييلة جدا

فى الأول ما كنتش عارفة الكافيه فين
و فضلت الف و ادور
بعدين لمحت لمة كبيرة بعيد
قلت يبقى اكيد هم دول ولاد مصر

اول من استقبلنى كان
why me
شخصية ودودة لأقصى درجة
و كان ترحيبه بى ترحيب اتنين اصدقاء بجد

بعد كده شفت سمراء
بنت مصرية جدعة و كلامها يشدك و كمان ابتسامتها حلوة

بعدين سلمت على ياسمين
و اللى فعلا شخصية تأسرك و تجبرك على إحترامها
و اللى سابت فى أثر عميق بعد ما اتعرفت بيها

طول ما انا قاعدة
كنت سامعة ناس عمالة تقول ايمن.. يا ايمن .. يا ايمااااان
قلت اكيد ده raspoutine
احد الشخصيات اللى فعلا تشرفت بمعرفتها امبارح
و هو كان الراعى الرسمى للتصوير
(الصور طلعت حلوة جدا يا ايمن... شكرا ليك)ا

بعدين من حسن حظى لقيت كرسى فاضى جنب وينكى
قعدنا نتكلم كأننا نعرف بعض من زمان
و بجد حسيت قد ايه عقلها سابق سنها بكتيييير

و جنب وينكى كان قاعد ابراهيم و معاه ابراهيم
انسان كوميدى من الدرجة الأولى و وشه بشوش
ساخر بشكل كبير و تعليقاته قوية
(شكله ابراهيم هو اللى دبر اللقاء التالت ده عشان يسوق كتابه... يلا مش مشكلة, الكتاب طلع يستاهل)ا

بعدين لقيت ياسمين بتسأل على كراسة الحضور و الغياب
فا قالولها لسه ماجاش
و حبة كدة لقيت ظيطة جاية من بعدين
و واحد عمال يجرى و بيقول انا هنااااااا
عرفت بقى ان ده ايهاب
شخصية محبوبة من الجميع
و هو اللى كان ماسك الحضور و الغياب

اللقاء ضم ناس كتيييير مقارنة باللقاء اللى قبله
و لظروف المواصلات و الذى منه اضطريت امشى بدرى
فمقدرتش اتعرف على كل اللى قاعدين
بس ده مايمنعش انى شفت ناس كتيييير كانوا بالنسبالى افتراضيين لحد وقت قريب
و اللى كنت سعيدة جدا انى على الأقل شفتهم زى
عمرو احمد
بيشوى the alien
هانى جورج
أ/احمد شقير
شادى فايد
الدبور
مايكل محسن
محمد عادل
سفاح كرموز
محمد رشاد
الفنان الأستاذ/حسنى سليمان
احمد المصرى

بجد مفيش كلام يوصف فرحتى بحضورى المناسبة دى
و احب اوجه شكر خاص لرامى
اللى لولاه ماكنتش حضرت اللقاء

لى بس ملحوظة اخيرة
ياريت يكون اللقاء بعد كده من 4 مثلا
عشان الناس اللى ظروفهم زى حلاتى

عموما
انا كان نفسى اقول كلام كتييير و اقعد مع ناس كتيييير
بس معلش
المرة الجاية تكون احسن
و فى انتظار اللقاء الرابع

تذكير

2007-03-09T00:08:00.001+03:00

بس حبيت افكركم
و أعرف اللى ما يعرفش
بكرة (الجمعة 9/03/07)
لقاء البلوجرز التالت
هيكون فى كافيه الإبداع
بجوار مسرح الهناجر
فى دار الأوبرا
الميعاد الساعة ستة

هحاول أحضر
و ياريت كل اللى عنده فرصة.. يجى
انا متأكدة انه هيبقى لقاء الأحلام
اتمنى اشوفكم كلكم بكرة
سلام

لمزيد من التفاصيل
برجاء زيارة العقل المدبر
ياسمين skylight
http://amyasser.blogspot.com/

Happy Valentine to meeeeee

2007-02-13T21:47:00.001+03:00

بالرغم من الحالة النفسية اللى ماشية فى سكة الإنحدار بقالها فترة
بالرغم من الجو العام المحيط الذى لا يدعو إلى اى نوع من البهجة
بالرغم من الإرهاق والتعب اللى مرحلين من الأسبوع اللى فات
بالرغم من الدراسة اللى ابتدت و اللى شكلها مش مبشر على الإطلاق
بالرغم من انه مافيش حد معين اعيد عليه او يعيد على فى هذا اليوم
اللهم إلا اصحابى
اللى ربنا يخلينى ليهم و مايحرمهمش منى ابدا
إلا انى قررت
بالعند فى كل ده
انتهز فرصة هذا اليوم
اللى هو من المفترض انه يكون مميز
و اعيد على نفسى
و اخرج من كل ده
و انطلق
مع صحابى او حتى لوحدى
المهم انى انطلق و السلام
و اقول لنفسى و للكل
Happy Valentine

السلطانيـــــة

2007-02-06T02:17:00.001+03:00

ييييييييييييييييييييييا شعبى الحبيييييييييييييييب الصبوووووووووور المهاااااااااااااااااود

قرار ديكتاتور رقم 77354

بقبول هدية مهداه لسموى

عدد تلاتة سلطا... عفوا

قصدى تاج

هدية مستعجلة لشخصى الكريم

حححححااااااااااااا

انا قلت ابتدى بداية قوية كدة حيث اننا هنتكلم عن تيجان و ملوك بقة و ناس مش اى كلام

اولا شكرا لبسبوسة البسابيس الأميرة بيسوو على التاج اللى ارسلته مخصوص من الجزيرة عندها

كمان بشكر الأمير عمرو و السلطان اسلامز على تيجانهم الغالية

نبتدى بقى بأسئلة عمرو و إسلام

اية اللي حيحصل لايميليك لما تموتى ؟

هيقفل بعد فترة و معتقدش حد هيفتحه او هيفكر فيه اساسا

اديتى الباس وورد لحد قبل كده؟

اه..اديته مرة لمامتى عشان النت عندنا مكانش شغال

و مرة اديته لأختى... مجرد فراغ كده و خلاص

لو اه كانت طبيعة علاقتك بيه اية؟

قريبة جدا

امى و اختى فقط لاغير

اســــــمك؟

نــــــــاديــــــن

اسم الدلع المشهورة بيه وسط اصحابك؟

صحابى اللى من زمان قوى بيقولولى يا نادوو

اما عيال الجامعة بينادولى يا الفا عشان انا الألفا بتاعتهم يعنى :D

انما بقى جوه العيلة بيقولولى يا دندن

اعمل ايه بقى, ماهى الناس المشهورة اللى زيى كده ليها اسامى دلع كتير

عمرك؟

تسعتاشر سنة و سبع شهور

برجك؟

السرطااااااااااااااااان

البرج اللى اصحابه مشهورين بالتناقضات

مجال دراستك؟

الآداب و التربية و اللغة الفرنسية

شخصيتك نوعها ايه؟

شخصيتى غريبة, بحس نفسى طيبة قوى و على نياتى قوى و شخصية مسامحة جدا بس لو فقدت الثقة فى حد.. صعب ارجعها تانى.

بحس انى مليانة تناقضات و انا عموما شخصية متقلبة بسرعة رهيبة و احيانا مجنونة

بحب اضحك قوى يعنى شخصية احب الإنطلاق و الضحك و الجنون و اللى بيكون احيانا وسيلة اخبى بيها حزنى

السفر بالنسبة لك؟

حياااااااااااااااااااااااااااااتى كلها

احلى حاجة فى الدنيا السفر, خصوصا لو مع ناس من سنى, او مع صحابى الحقيقيين اللى اعرفهم من زمان

بوجه عام السفر بيثير جوايا مشاعر جميلة قوى و بيخلينى انسى اى هموم جوايا

اتمنى اعيش حياتى كلها فى سفر

المود بتاعك؟

متقلب الى اقصى درجة

ممكن اكون قاعدة بسمة نكتة تضحكنى جدا, و فجأة افتكر حاجة تزعلنى اقوم اكتئب.. و العكس صحيح

الاكلة المفضلة؟

الأكلة المفضلة بتاعتك ايه يا نادو؟؟ الأكلة المفضلة؟؟

اه

بحب جداااااا ورق العنب, و الفراخ دى عشقى

كمان لما ببقى جعانة و قاعدة لوحدى ممكن اعك اى عك كده... بس بيطلع ظريف

الصفات اللي خدتيها من بابا؟

اخدت من ابويا حب القراءة و المعرفة بوجه عام او تقدر تقول حب الثقافة

و الحساسية المفرطة

كمان كتير بيقولولى انى شبهه.. بس هو احلى منى

الصفات اللي خدتيها من ماما؟

طريقتها فى التفكير

إحساسها بالآخرين

تحليلها للموضوعات بشكل عام

و عموما انا واخدة كتير من صفات امى

اكتر 6 حاجات بتكرهيها؟

الكدب ثم الكدب ثم الكدب

الحزب الوطنى

الطابور اللى عندنا فى الجامعة

الناس اللى بتبثق فى الشارع

أى حد يهدملى احلامى.. لأن الحلم بيكون غالبا هو كل ما املك فى هذا الزمن

و اخيرا.. بكره الأحوال اللى إحنا عايشينها دلوقتى.. و ساكتين عليها

اكتر 6 حاجات بتحبيها؟

بحب القراية

بحب البحر و المياه و المطر جداااا يعنى بحب البلبطة فى الميه طول الوقت

بحب اناااااااااام

بحب قعدتى مع صحابى

بحب الموسيقى حدا حدا
بحب عيلتى جدا جدا

و نزود عليهم الأفلام اللى فيها قصص إنسانية واقعية

الشغل بالنسة لك؟

امنيتى فى الحياة, نفسى من زمان اشتغل او اجرب طعم الشغل ولو حتى فى الصيف

ايه الكمبيوتر والانترنت بالنسبة لك؟

ده بقى إدمان

يااااااااه ده لازم على الأقل ساعتين فى اليوم قدام الكمبيوتر

محدش مخه يروح لبعيد و يفتكر إن الموضوع مجرد تشات و ميل

لأ, انا تقريبا الإنترنت ده اصبح المصدر الرئيسى لمعلوماتى

اما بيسوو بقى فكانت عايزة تعرف خمس حاجات عنى محدش عرفها قبل كده

يعنى خمس اسرار

ماشى يا بيسوو

اولا: بحب اقعد اتكلم مع نفسى جدا و ياريت محدش يتريق عليا

بس انا بحب اتفاهم مع نفسى بصوت عالى و اكون لوحدى

ثانيا: جيت و انا فى ثانوية عامة كنت بركن الفيزياء عشان مكنتش بحبها و كنت طول الوقت بقعد اذاكر رياضيات و انا مشغلة موسيقى.. محدش كان يعرف الموضوع ده بس طبعا الناس كلها اتصدمت لما لقونى مقفلة الرياضيات و يادوب ناجحة فى الفيزياء

ثالثا: و ده بينى و بينكم, كذا مرة فكرت اروح لدكتور نفسى, بحس كتير انى مش فاهمة نفسى و ان جوايا دهاليز و سراديب مظلمة محتاجة انورها و اكتشفها عشان اعرف اعيش صح. بس للأسف مش قادرة اعرض موضوع زى ده على اهلى!!!

رابعا: بخاف من فكرة الجواز و تغير الحب بعد الجواز و عندى إستعداد افضل طول عمرى منغير جواز بس ماتجوزش واحد لمجرد سد خانة

خامسا: هى ماتعتبرش سر يعنى , بس هقولها برده

انا دلوقتى و انا فى سكة العشرين سنه, حاسة ان طفولتى كانت سعيدة جدا, جوايا مخزون ذكريات طفولة و ايام سعيدة و لعب و شقاوة و حركات بتساعدنى انى اكمل حياتى.

اقدر اقول انه اتيحت لى فرص كتير مكانتش متاحة لناس غيرى و ده عشان ربنا ادانى اهل مميزين زى اهلى

احب بقى اهدى التاج ده:

Non Sense لرامى

مها- غربة وطن

بيجاسوس المصرى

الرقيقة كارول

حد فاهم حاجة؟

و Lion king

و باى باااااااااى

وحدة فى الزحام

2007-01-22T18:52:00.001+03:00

لطالما احب منظر السوق ساعة الظهيرة
و هو ملئ بالنساء من كل لون و شكل
لا يهمه ما يفعلن, فقط يطمئنه مجرد رؤيتهن
يسير كالتائه الهائم وسط الزحام
يبحث بينهن و يفتش فى وجوههن
عمن يجد فى عينيها عطف و حنان يحتويانه
ينسيانه حاله
سنه الصغيرة لم تسمح له بمعرفة لفظ "اليتيم
لكنه مبكرا عاش معانيها
يجزم انه لم تكن له ام من قبل, و له الحق, فهو لم يرها و لا يتذكرها بل لم يعرفها
لذا
فهو يعتقد انه دون البشر جميعا, ولد من الأرض
او هكذا يقول للأطفال من نفس سنه
فالأرض هى الحضن الوحيد الذى استقبله
و هو بزيارته للسوق, يتمنى ان يكون كباقى البشر
لديه من تحضنه, تقبله, و تعطيه الحلوى
فقط
ليس اكثر من ذلك
و لكن
ليس فى السوق من يلتفت اليه
فضئالة جسمه و نحافته يجعلان من السهل تفاديه
بل يجعل من الصعب رؤيته احيانا وسط الزحام
كما ان كل سيدة جاءت للسوق, لديها قائمة من المهام لا تحيد عنها
و ما غير ذلك فهو لا يعنيها
----
و لا يمل الصغير
فيعيد الكرة مرة بعد مرة
و يذهب
كل يوم فى رحلة امل جديدة الى السوق
و يجد سوقه خالية بالرغم من الأجساد المتلاصقة فى زحام شديد
و يعود
إلى الأرض, امه التى عرفها
يزيح الحصيرة و يلقى بنفسه على التراب
كأنما لا يريد ان يفصله عنها شئ
ينكمش كأنما يحضن نفسه
او كأنما يستشعر حضنها
و يحاول ان ينسى همومه
بالهروب الى نوم عميق
و حلم بمن يضمه و يحتويه
حلم بأم فى يوم ما

ٌReal Love

2007-01-19T13:04:00.001+03:00

بحب الصورة دى قوى
و من وجهة نظرى
انه برغم بساطتها
إلا انها حملت المعنى الحقيقى للحب
الحب
الحنان
التقارب
الإحتواء
التكامل
الدفء
و كل ده منغير ما حد فيهم يفقد هويته او شخصيته
و اعتقد ان بهذا
يصل الحب إلى الكمال

(الصورة دى كانت منشورة فى احد موضوعات الدستور بس للأسف مش فاكرة مين اللى رسمها

احلام يقظة

2007-01-11T14:02:00.002+03:00

احيانا
اذهب بخيالى بعيدا
حالمة بغد قريب و بعيد
بأمنيات و أحلام
ممكنة و مستحيلة
و فى ظل استغراقى
يفاجئنى الخوف
يلوح بوجهة وسط احلامى
فأتوقف عن التفكير
و اعود لعالم الواقع
و أسأل نفسى
ماذا سيحدث غدا
و ماذا بعد غد
كيف سيكون حالى بعد عشرون عاما
.........
اصمت
فليس لى رد
و اقرر ان اترك كل هذا
و اعيش حاضرى
هذا الحاضر الذى انا متأكدة لوجوده
و اترك الغد ..... للغد

تحت المطر

2007-01-06T00:01:00.001+03:00

الساعة: الواحدة ظهرا

الخلفية: إحدى شوارع القاهرة, شارع مليء بالمارة و المحلات و الحركة

الشخصيات: مارة فى الشارع, و الشخصية المحورية وهى فتاة فى العشرين

تمطر الدنيا كما لم تمطر من قبل. و الشوارع ممتلئة ببرك المياه. و هى مستمتعة بقطرات المياه التى تتساقط عليها كالسيل. لا يهم. فهى فى طريقها للمنزل. و لكن الجو الممطر يغريها بالبقاء اطول فترة ممكنة, فالأشجار مغسولة و ظهر لونها الأخضر, و الهواء منعش و نظيف و هذا لا نجده كثيرا فى شوارع القاهرة الخانقة.

الجو ممطر و لكنه ليس كئيبا مقبضا, على العكس, يعطيك إحساس بالراحة.

تذكرت بعض الطلبات من السوبرماركت, دخلت و اشترت و ذهبت لتحاسب الكاشير عندما رن تليفونها المحمول.

اهملته " لما اخلص ابقى اشوف مين". و لكنه ظل يرن. انتهت سريعا من الدفع و اخرجت الموبايل

My Angel

هكذا ظهر الاسم على الشاشة

ابتسمت. و لكى تكونوا معنا فى الصورة, ف(ماى انجل) هذا, شخص تعرفت عليه فى ظروف غريبة, و لكن سريعا, اصبحوا اصدقاء مجرد اصدقاء, لكن داخلها احساس آخر اكثر من مجرد صداقة, و مع ذلك , هى محتفظة بتلك المشاعر لنفسها حتى تجد فى الأمور أمور.

ردت. "- ألو! - ايه يا بنتى مش يتردى عليا ليه؟ - معلش اصلى كنت فى المحل و بحاسب عالحاجة و لسة مخلصة. - ماشى يا ستى, هتنزل المرة دى ( يضحكان) و إزاى الحالة المعدنية النهاردة؟ - تمام الحمد الله النهاردة احسن كتيييير, شفت صحابى و اتفاهمنا و المشكلة خلصت. كمان مكانش فيه محاضرات كتير, فاليوم كان ظريف قوى. - طب عال عال, انا كنت متأكد ان الأمور هتتحسن.......

ظلا يتحدثان, يخرجان من موضوع, يدخلان فى الآخر. و هى ببساطة..سعيدة. فالجو رومانتيكى شاعرى, و معها على الخط انسان عزيز عليها جدا, و الحياة لا يمكن ان تكون اجمل من ذلك. كم تمنت الا تنتهى هذه اللحظات ابدا.

1ère mémoire

2006-12-29T14:17:00.001+03:00

مممممم
و عدى شهر منذ جئت هذا البيت
و حقيقى
اعتبر ان البلوج ده افضل ما عملت من فترة طويلة
و بالرغم من ان مجتمع الأنترنت مجتمع افتراضى
بس بحس انى اتعرفت على أشخاص و اصدقاء كثيرين زى ما يكونوا قدام عينى
عرفتهم, تعلقت بهم, شعرت بهم, بل رأيتهم
مش عايزة اقول اسماء عشان منساش حد
كل واحد قريتله بوست, كل واحد كتب كومنت, كل بلوج زرتها
و حقيقى
بدأت اشعر ان عالم التدوين جزء مهم فى حياتى
حتى لو قعدت فترة من دون ما اكتب
بس هيبقى على طول فيه مكان و بلوج من البلوجات اللى ممكن اروحها, اغير جو :)

فعلا من ساعة ما بدأت التدوين او فكرة كتابة الخواطر بوجه عام, حاجات كتير جوايا اتغيرت

عموما
انا بس حبيت اشكر كل المدونين
كل واحد وواحدة باسمهم
Un Tres Grand Merci A Tous

حدث فى لجنة امتحان

2006-12-29T13:29:00.001+03:00

هاللوووو شباب
بصوا بقى
بمناسبة الإمتحانات اللى شغالة دلوقت
احكيلكوا على موقف حصلى فى لجنة امتحان فى آخر السنة السنة اللى فاتت

قال ايه
كان آخر امتحان
و طبعا كلنا خلاص مكناش طايقين نبص فى كتاب
بس كان عندنا إمتحان كمبيوتر
مادة كده ملهاش نجاح او سقوط
المهم
المادة بالرغم انها مش مهمة و مش فارقة معانا إلا إن لو حد سقط فيها بيضيع عليه تقدير السنة و يفضل يعيدها لحد ما ينجح فيها
و كتاب المادة دى عبارة عن كتاب من 200 صفحة مليان اوامر دوس و محدش طبعا حافظ اى حاجة فى أى حاجة

المهم
قاعدين فى لجنة الإمتحان
استلمنا الورق
و نفاجأ إن ورقة الأسئلة عبارة عن انتقام الدكاترة فينا
كأنهم بيقولولنا: ورونا بقى هتنجحوا ازاى
يعنى بالعربى امتحان ورقتين فيه ست اسئلة, كل سؤال فيه عشر نقط, كل نقطة فيها أ,ب, ج, د
بص بصراحة رغم ظروف الإمتحان إلا إن اللى حصل ماينفعش يعدى كده ببساطة

المراقب و المراقبة اللى كانوا علينا شافونا فى المنظر ده صعبنا عليهم
راحت المراقبة وشوشت واحدة من زمايلى
لقيت البنت بتطلع كتاب الكمبيوتر و بتديه للست
لقيت المراقبة راحت ناحية الحمام و رجعت ايديها فاضية
شوية و لقيت البنت راحت داخلة الحمام
و رجعت جرى على ورقتها و هاتك يا كتابة
تكرر الموقف مع ناس تانية
المراقبة توشوشهم, يقوموا عالحمام, يرجوا و الوحى نازل عليهم
لحد ما جه دورى
قالتلى المراقبة: كتاب الكمبيوتر فى الحمام, تحبى تقومى؟؟؟
بصتلها كده و انا متنحة
لا شكرا الحال ماشى
بصتلى شذرا و قالتلى انت حرة
و نقلت عاللى ورايا

بصراحة مبحبش الغش
عشان لما اجى اطلب من ربنا يقف معايا, يبقى لى عين اطلب منه
و اعتقد ان فيه كتيييييير قوى زيى

المهم
جه بقى المراقب التانى, عايز يعمل حاجة يساعد بيها طلبة مصر المحروسة
راح ماسك ورقتى
قعد يفر فيها
و البنت اللى وراه قالتله لو سمحت اجابات الصح و الغلط ايه؟
راح هو سألنى انت كاتباهم فين؟
كنت هرقع بالصوت.... بس الذهول منعنى
شديت منه الورقة و انا مش مصدقة
قولتله محلتهاش
و قمت سبتهم و قعدت قدام و انا بعيط
و للأسف مقدرتش اخد موقف او اشكى المراقبين دول لسببين:
1- الذهول و الخوف اللى كنت فيه كان اقوى من اى رد فعل
2- كان ممكن قوى المراقب يعلم عالورقة و يطلعنى انا الغشاشة
بس معلش
ربنا كبير

مكنتش عايزة اجيبلكوا اكتئاب, انا بس كنت بحكى اللى بيحصل فى اللجان
و ياما فيه حاجات أكتر من كده بتحصل

قبل ما انسى
عايزة اتمنيلكوا
كل سنة و كلكوا طيبييييييين و بخيييييييييير

مشروع جديد لانج

2006-12-20T23:35:00.001+03:00

مشروع كارنيه مضروب لكل طالب
و قريبا هيبقى لكل مواطن

ايه رأيكوا فى الفكرة دى؟؟؟
بصراحة انا حسيت إحنا قد ايه فى حاجة ماسة لمشروع زى ده لما كنت بطلع كارنيه الجامعة
اعتقد ان كل واحد مر بالمرحلة الجامعية حس بمدى صعوبة استخراج كارنيه الجامعة و دفع المصاريف لدرجة انه احيانا الحصول على لبن العصفور بيكون اسهل
المهم ان كارنيه الجامعة بتاع السنة دى اللى يفرق بينه و بين بتاع السنة اللى فاتت هو ان ظهر الكارنيه بقى لونه ازرق بدل الاصفر
و الحكاية دى سهلة
نلونه
بس انى اقف اربع ساعات كاملة عشان اطلع حتت كارنيه و فى الآخر يقولولنا عدوا علينا كمان اسبوع عشان مفيش إستمارات
ده اللى كان اوووووووووووففففففففررررررررر

لذلك
قررت انا الموقعة ادناه إنشاء نواة هذه المؤسسة الوطنية لخدمة العامة مع إمكانية التوسع لتشمل الخدمة جميع المواطنين بمختلف كارنيهاتهم
على من يريد الإنضمام للشركة إرسال السى فى فى موعد اقصاه عشر سنين قدام
يفضل خريجى فنون جميلة و ناس يكون ليها فى الرسم

ملحوظة: المشروع ده متسجل فى الشهر العقارى بإسمى فمحدش يحاول ياخد الفكرة كده ولا كده....البلد فيها قانون

إمضاء: انا :)

: ) حاجة بحبها

2006-12-19T15:25:00.001+03:00

مارسيل خليفة

حيث انى دلوقتى فى فترة إمتحانات
و حيث إنى أعانى من حالة توقف فى الأفكار و كل ما يستدعى تشغيل المخ نتيجة حفظ المناهج بتاعتنا دى
و حيث إن عزائى الوحيد عن المذاكرة هى الموسيقى
لذلك
قررت انى اكلمكم شوية عن بطل اساطيرى و عالمى الخاص
الأسطورة المبدع دائما
مارسيل خليفة

و لمن لا يعلم من هو مارسيل خليفة
اقولكوا انا

مارسيل خليفة (ولد عام 1950 في بلدة في جبل لبنان ) مؤلف موسيقي ومغني وعازف عود لبنانى . يعتبر مارسيل أحد أهم الفنانين العرب الملتزمين بقضية فلسطين ,عرف مارسيل دوما بأغانيه التي تأخذ الطابع الوطني، وبأسلوب دمجه بين الموسيقى العربية والآلات الغربية كالبيانو. اعتقل على يد الاحتلال و تعرض للتعذيب .

خلال أواخر السبعينات و الثمانينات لحن مارسيل أولا قصائد الشاعر الفلسطيني محمد درويش مطلقا ظاهرة غناء القصيدة الوطنية الفلسطينية التي تمتزج فيها صورة المرأة الحبيبة بالأرض و الوطن أو الأم و الوطن معا , كانت البدايات مع : "ريتا و البندقية" و "وعود من العاصفة"

في المرحلة الثانية (من التسعينات إلى الان) بدأ مارسيل يميل أكثر للتلحين الموسيقي البحت دون الغناء فكانت بداية مشاريعه الموسيقية التي بدأها بمعزوفة "جدل"

ده بعض ما كتب عن مارسيل على الويكيبيديا
اما بالنسبالى انا
تعرفت على الفنان ده من أغنية "منتصب القامة"
اغنية جميلة جدا و معبرة
و من اكثر اعماله اللى بحبها
- مقطوعة قانون
- اغنية العائد
- اغنية الجسر
- مجموعة جدل (اربع قطع موسيقية)
- العاديات
- الرحيل
- رقصة الكاهنات
- زفة العروس (الجزء الثانى)
و أغانى كتيييييييير تانية

لمن يرغب فى تحميل اكبر قدر من اغانى و موسيقى مارسيل
عليكوا و على http://arabic.salmiya.net/songs/marcel/

اتمنى مكنش طولت عليكوا
حبيت بس اقدملكوا بعض من الموسيقى اللى بحبها

ادعولى بقى عشان اخلص امتحانات على خير
سلااااااااااااام جميعا

وصلت بيتنا سليمة....احمدك ياااااارب

2006-12-11T19:24:00.001+03:00

حمدالله على سلامتى
فضلت اقول الجملة دى كتير لنفسى و انا مش مصدقة إنى وصلت البيت سليمة
هو المفروض يعنى انه انا كنت فى الجامعة, أى انه يكون يوم عادى جدا
بس النهاردة ماكانش يوم عادى بالمرة

نازلة الصبح عندى امتحان الساعة 9
نازلة من بيتنا 8 و تلت, عادة السكة بتاخد نص ساعة
ركبت الميكروباص
و السكة واقفة
المهم وصل الميكروباص قدام الكلية
و إذ بى أفاجاء بحاجة عاملة زى غطا العربية مرمية على الأرض و حاطين حواليها كراتين كبيرة عشان محدش يقرب
و بفضول كده كنت ببص ايه ده
طلعت جثة لشخص مجهول دمه سايح عالارض,مات تحت عجلات الاتوبيس
...........................
طول عمرى اشوف الحاجات دى فى الجرايد فى التلفزيون
بص انى اشوفه كده عينى عينك مفيش بينى و بينه نص متر
دى اللى كانت جديدة و مؤلمة قوى عليا
لقيت نفسى بعيط مع إنى معرفوش
بص الموقف كان صعب

(يا ايها الرجل ياللى معرفش حتى اسمك,ياللى مات تحت عجلات الاتوبيس النهاردة الصبح قدام عينى
الله يرحمك و يرحمنا جميعا)

لكم ان تتخيلوا ان انا بعد الحكاية دى كلها كنت داخلة على إمتحان نص سنة
طبعا إجابات فل الفل و التركيز كله كان فى الإمتحان

و خلص الامتحان
و قلت اللى حصل حصل
انسى يا بنتى و كملى يومك عادى و لا كأن فى حاجة حصلت
اوووووووووووووووووووك
شوية كدة
وطلعت من الجامعة
كان ورايا مشوار
و انا ماشية فى الشارع
عدى من ورايا اتوبيس كان هيشلنى فى سكته
طبعا افتكرت كل اللى حصل للراجل و جه فى بالى منظرى و انا مرمية زى الراجل اللى مات

رجلى سابت و حسيت إنى هقع من طولى
قلت ما بداهاش
هروح النهاردة و الحمدلله اليوم على كده

ركبت التاكسى
و الشارع واقف على غير العادة
اتارى قدام عربيتين دخلوا فى بعض و واحدة منهم بقت عجينة

يا لهويييييييييييييييييييييييييى
طلبت من السواق يوصلنى لحد باب البيت
و طول السكة كنت قاعدة مغمضة عينى
لحظة ما دخلت باب الشقة
اترميت على اقرب كنبة
و قلت لنفسى
حمدالله على سلامتى

فى الهوا

2006-12-05T13:47:00.001+03:00

كلام كلام كلام كلام كلام كلام كلام كلام كلام كلام
كلام كلام كلامكلام كلام كلام كلام كلام كلام كلام
كلام كلام كلام كلام كلام كلام كلام كلام كلام كلام
كلام كلام كلام كلام كلام كلام كلام كلام كلام كلام
كلام كلام كلام كلام كلام كلام كلام كلام كلام كلام
كلام كلام كلام كلام كلام كلام كلام كلام كلام كلام
كلام كلام كلام كلام كلام كلام كلام كلام كلام كلام
كلام كلام كلام كلام كلام كلام كلام كلام كلام كلام
كلام كلام كلام كلام كلام كلام كلام كلام كلام كلام

يا مسهل الكلام
يا مكتره
أسوأ حاجة
إنه يجى فى وقت
يفقد الكلام معانيه
مايبقالوش لزمة
و يبقى مجرد
كلام فى الهوا
لا يودى ولا يجيب
ساعتها الواحد
بيحس إن صوته اتنبح
اندبح
محدش سامع
لأنه أصلا مفيش كلام اتقال
كل اللى اتقال
مجرد
كلام فى الهوا

أممكن؟؟؟

2006-12-04T20:15:00.001+03:00

الساعة عشرة الصبح
انا فى الكلية
مفيش محاضرات النهارده
برغم إن مالينى إحساس بالكآبة و التعب و الإرهاق من كل اللى حوالى
و ماليش أى نفس أروح البيت و انا فى الحالة دى
إلا إنه مفيش حل تانى
غير التوجه للبيت

و انا فى الميكروباص
الراجل بينده
عباسية رمسيس عباسيةرمسيس رمسييييييييييييييييييس
إيه ده
انت رايح فين
رمسيس يا آنسة

يكونش انا سمعت غلط و ركبت؟
معقول؟؟؟
يكونش سمعت صح و برضه ركبت؟
مش عارفة ليه متكلمتش
مش عارفه ليه ماقلتلوش نزلنى لو سمحت
حسيت إن ركوبى الميكروباص ده مش مجرد صدفة
حسيت إنه مش مجرد غلطة
تكونش دى إستجابة من ربنا؟؟؟
مش انا اللى كان نفسى من فترة طويلة اروح إسكندرية و ارجع آخر اليوم؟؟؟
أروح عشان بس أطل عالبحر؟؟؟

بصراحة مكدبتش خبرو عملت فيها عبده العبيط
نزلت فى محطة مصر
و مشيت زى البنى آدم المتبرمج ناحية مكان التذاكر
و قطعت تذكرة فى القطر الفرنساوى

مرت حوالى نصف ساعة, بعدها منت قاعدة فى كرسى جمب الشباك
و القطر بدأ يتحرك
قلت أكلم خالتى
ألو
انا جايالك يا طنط
جايالى فين يا ماما؟
جايالك إسكندرية

حبة كده و بعت رسالة لمامتى اقولها انا فى مشوار ماتستنونيش عالغدا

مرت تلات ساعات و كنت فى اسكندرية
سبورتنج ياسطى من عند الكورنيش
و وصلت سبورتنج
و قابلته
شفته
هو بعينه بلونه بموجه الابيض
و استقبلنى بريحة يود جميلة مليت بيها رئتاى
اصل الهوا ده مش بنلاقيه عندنا نحن معشر القهراوية
حسيت إنه كان مستنينى
-إتأخرتى عليا ليه؟؟
-معلش, صدقنى بقالى كتير نفسى اشوفك
و قعدت على صخرة
و فضلت ابصله
بنتكلم بالنظرات
مادريتش بالدنيا غير لما اتنين حبيبة جم قعدوا جمبى و صوتهم كان عالى
الظاهر كانت الخناقة على الخطوبة
ببص فى الساعة
يانهار أسود!!!
دى الساعة بقت خمسة

زى الشاطرة
نطيت فى أول تاكسى لقيته
محطة سيدى جابر ياسطى
و ركبت قطر القاهرة
طبعا كانت الدنيا ليللت لما وصلت
بس مكانش هاممكنى حاجة
كنت مبسوطة
مرتاحة
مرتاااااااااااااااااااااااااحة

"طبعا لو كانت كل همومنا بسيطة لدرجة إنها بتنتهى بمجرد ما ننساها, كانت تبقى الحياة غير الحياة و الدنيا غير الدنياو كانت تبقى عيشيتنا كلها بمبى و ورد و فل"

طبعا اللى مكتوب فوق ده مجرد حلم ناتج عن رغبة فى الهروب كامنة فى العقل الباطن نتيجة الإحتكاك بالواقع المليئ بالمشاكل التى هى سببها الإنسان نفسه...
مش ده اللى قالوهولنا فى علم النفس؟؟؟؟

2006-12-01T12:32:00.002+03:00

J'ai la tête qui éclate
Je voudrais seulement dormir
M'étendre sur l'asphalte
Et me laisser mourir

Stone
Le monde est stone
Je cherche le soleil
Au milieu de la nuit

J' sais pas si c'est la terre
Qui tourne à l'envers
Ou bien si c'est moi
Qui m' fais du cinéma
Qui m' fais mon cinéma

Je cherche le soleil
Au milieu de ma nuit

Stone
Le monde est stone

J'ai plus envie de me battre
J'ai plus envie de courir
Comme tous ces automates
Qui bâtissent des empires
Que le vent peut détruire
Comme des châteaux de cartes

Stone
Le monde est stone

Laissez-moi me débattre
Venez pas m' secourir
Venez plutôt m'abattre
Pour m'empêcher de souffrir
J'ai la tête qui éclate
Je voudrais seulement dormir
M'étendre sur l'asphalte
Et me laisser mourir
Et me laisser mourir

دى كلمات اغنية بيغنيها واحد من أشهر المغنيين الفرنسيين إسمه GAROU
الأغنية بتتكلم عن واحد تعبان من الدنيا
نفسه يرتاح منها
و يريح دماغه من كتر التفكير

الأغنية دى جت على هوايا قوى إمبارح و لقيت نفسى عمالة بسمعها و أعيد و أزيد فيها
يمكن عشان كنت فى حالة إحباط
أو صدمة من موقف حصل
المهم
حسيت الأغنية دى بتتكلم عنى

صعب قوى إحساس إنك تعمل الصح و تبقى عارف إنه صح و تلاقى كل اللى حواليك بيعملوا الغلط و مفيش حد بيحاسبهم
لأ و إيه
يبصولك على إنك انت الغريب اللى فيهم

إحساس بالصدمة
صدمة فى ناس
فى مجتمع

بس فى الأول و فى الآخر
حتى لو كل العالم ضدى
فأنا ضد العالم

بخ!!! إحنا بتوع التربية العملى

2006-11-28T18:05:00.001+03:00

يوم فى حياة مُدرسة ... لسة مابقتش مُدرسة

النهاردة يوم التلات
و لمن لا يعرف ايه هو يوم التلات بالنسبالى
اقولكوا
يوم التلات ده يوم العذاب الأذلى اللى بيُسمى مجازا "يوم التربية العملى"
حيث اننا بنروح المدرسة
المفروض نكون ضيوف عليهم
مانحضرش غير حصة واحدة المقررة علينا و نمشى
لكن الواقع غير كده خالص
لو فى حصة احتياطى بنقعدها
و لو مفيش بنقعد برضه
و حيث ان العيال الطلاب بتوع الثانوية العامة متعودين انه يجيلهم ضحايا العملى اللى هم إحنا
فبيعاملونا كأننا مش من مقامهم

دى فكرة عامة عن يوم التلات عندى

احكيلكوا بقى عاللى حصل النهاردة
من لطف ربنا بينا
مقعدناش كتير إشراف على ثانوية عامة
لأ و اييييه
وقفنا مراقبة فى لجنة إمتحان فى المدرسة

مش قدرة اوصفلكوا كان إحساسى ايه و انا اول مرة اراقب مش اتراقب
يمكن دى كانت اول مرة فى حياتى انى اكون مراقبة
حسيت بحاجة غريبة
حسيت بالقوة؛ بالسلطة؛....
إحساس غريب قوى لما تبقى عارف انك مسئول عن مصاير ناس
طبعا انا لا كنت متحكمة فى مصاير اللى بيمتحنوا دول ولا حاجة
اخرى اصلا اقوم واحدة و انقلها من مكانها
او ازعق
بس الفكرة فى حد ذاتها... هى اللى شدتنى
و إذا نظرنا للموضوع بشكل أعم و أكبر
فكرة الرقيب نفسها
بتدى نوعا ما إحساس بالعظمة و الإرتفاع عن الباقيين
يمكن عشان الإنسان بيربط الرقابة بالله على إعتبار إنه شايفنا و شايف تصرفاتنا سواء شئنا أم أبينا

شوية كلام جه فى بالى بمناسبة اول مرة اراقب فيها على فصل كامل و أمارس كل مهام المراقب من غلاسة على المُراقبين و تزنيق عليهم و منعهم حتى من الالتفات حواليهم (برد فيهم اللى كان بيتعمل فينا زمااااان)

دا كان ملخص يوم التلات
و دى كانت إحدى أيام مُدرسة اللى هى انا
ادعو إن التلات الجاى يعدى دون إصابات أو حصص إحطياتى (إله ما يوقف حد فيكم فى حصة من دول)
و سلااااااااام

2006-11-27T14:36:00.001+03:00

أخيرااااااااااااااااااااااااااااااااا
أصبح عندى المدونة الصغيرة الخاصة بى
اوووووبس
ماتعرفناش
انا طالبة فى سنة تالتة
بعشق القراءة بس عمرى ما جتلى الجرأة انى اكتب
بس اهى .... محاولة
عموما مش هطول عليكوا
اتمنى تكون مدونتى تستحق مروركم و اهتمامكم
اسيبكوا مع واحدة من أحب اعمال مارسيل خليفة لقلبى
و اشوفكوا قريب
سلااااااااااااااااااااااااااام