الأربعاء، ٢٠ ديسمبر ٢٠٠٦

مشروع جديد لانج

مشروع كارنيه مضروب لكل طالب
و قريبا هيبقى لكل مواطن

ايه رأيكوا فى الفكرة دى؟؟؟
بصراحة انا حسيت إحنا قد ايه فى حاجة ماسة لمشروع زى ده لما كنت بطلع كارنيه الجامعة
اعتقد ان كل واحد مر بالمرحلة الجامعية حس بمدى صعوبة استخراج كارنيه الجامعة و دفع المصاريف لدرجة انه احيانا الحصول على لبن العصفور بيكون اسهل
المهم ان كارنيه الجامعة بتاع السنة دى اللى يفرق بينه و بين بتاع السنة اللى فاتت هو ان ظهر الكارنيه بقى لونه ازرق بدل الاصفر
و الحكاية دى سهلة
نلونه
بس انى اقف اربع ساعات كاملة عشان اطلع حتت كارنيه و فى الآخر يقولولنا عدوا علينا كمان اسبوع عشان مفيش إستمارات
ده اللى كان اوووووووووووففففففففررررررررر

لذلك
قررت انا الموقعة ادناه إنشاء نواة هذه المؤسسة الوطنية لخدمة العامة مع إمكانية التوسع لتشمل الخدمة جميع المواطنين بمختلف كارنيهاتهم
على من يريد الإنضمام للشركة إرسال السى فى فى موعد اقصاه عشر سنين قدام
يفضل خريجى فنون جميلة و ناس يكون ليها فى الرسم

ملحوظة: المشروع ده متسجل فى الشهر العقارى بإسمى فمحدش يحاول ياخد الفكرة كده ولا كده....البلد فيها قانون

إمضاء: انا :)

هناك ٩ تعليقات:

basma saghir يقول...

هو طبعا انا موافقة جدا لاني اتعذبت زي حضرتك كدة بالضبط
وفي سنة التخرج نبقى نديلهم فلوسهم احنا برضو بنعرف في الاصول

Nadine Alfred يقول...

بيسوو

يا اهلا يا اهلا بيكى فى بيتى المتواضع
و اشكر ليكى مساهمتك عشان نقدر نطلع المشروع ده للنور
قريبا هيبقى فيه فرع لجوازات السفر المضروبة و بطايق التموين و شاهادات التخرج و كل ما يهم المواطن المصرى

البلوج عندك جميلة قوى و فعلا حلوة
ابقى زورينى كتير
سلام يا قمر

Amr Ahmed يقول...

هااااااااااااااااي نادو

انا الحمد لله طلعت الكارنيه بسهولة

انتي عاملة ايه في الامتحانات

ربنا معاكي

ابقي طمنيني


وعلي العموم انا معاكو في اي حاجة

يللا اي خدمة

islamz يقول...

ايه الافكار الجهنمية دى يا نادين .. تضربي كارنيهات مرة واحدة .. طب والله عال عال .. طب ايه رايك لو اشترك معاكى ونضرب شهادات خدمة عسكرية .. وانا مقبلش فى الحكاية دى اقل من عششيين جنيه او واحد وعششيين جنيه

اصل مادى ومعنوى .. ههههههههههه

يخرب عقلك يا نادين .. هتودينا فى داهية .. عارفة حكايتك ليها حل واحد .. تدخلى على شئون الطلبة وتشوفى المسئول عن فرقتك وتقوليله مش طالعة غير بالكارنيه .. ويا انا يا الكارنيه

واضربيه او عضيه او اخبطيه باى حاجة .. ولو سالوكى انتى متعرفينيش خالص وانا من ناحيتى ولا هجيب سيرة

بس متنسيش العشششييين جنيه

-----------

ربنا يوفقك فى امتحاناتك يا رب يا نادين .. وادعيلي انا كمان والنبي لحسن مطحووون

متجيبي العششييين جنيه بقي

:] سلااامز

Nadine Alfred يقول...

عمر
يا بختك يا عمممممم
ناس تطل الكارنيه بسهولة
و ناس الكارنيه يطلع عينها
وياريته عالكارنيه و بس
ده الظاهر ان فكرة الطوابير دى مبدأ عندنا فى الجامعة
يلا
ادعيلى بس اعرف اطلعه قبل السنة ما تخلص

---------
اسلامز

هو ده الكلام ولا بلاش
بص احنا نبتديها الأول كارنيهات
و لما ايدنا تاخد عالشغلانة نبقى نضرب اى حاجة
انشالله نضرب فى بعض حته (نياهاهاهاهاها

انا بقيت شريرة على فكرة
بس مش مهم
نموت نموت و يحيا الكارنيه

بس ايه ده يا عم انت
بقى جاى اخر الشهر تقوللى هاتى عشششييين جنيه؟
ده كلام برضه؟

يلا انا هعمل نفسى ماسمعتش حاجة :P

ربنا معانا كلنا يا شباب
سلااااااااااااااااااااااااام

Carol يقول...

حلو اسلوبك الساخر:)
و من الاسباب الاولى في بلدنا
الجايبنا ورا هو النظام البيروقراطي المعقد
ربنا يستر علينا

غير معرف يقول...

بجد يا نادين فكرة هايلة و لو مش عندك الامكانيات انا مستعد اتعاون معاكى و النص بالنص و نعمل مشروع كارنيهات كبير و مش بعيد نطورة و يبقي عالمى
مع تحيات محمد بهاء

SomeOne يقول...

ههههههههههه
ههههههههههههه
هههههههههه

انا عايز انضم كعضو مؤسس
انا زورت قبل كده كارنيهين

ليا خبرة يعني

ههههههههههههههههههههههههههههههه


اربع ساهات؟؟
هما دول حاجة

انا اختي ف كلية البنات عين شمس
كنت اروح معاها 3 ايام
وتقف في الطوابير
ونرجع من غير ما نعمل حاجة
لازم تضرب و تزق وتشد من الشعور والايشارب علشان تعرف توصل للشباك
ده بس عشان تدفع المصاريف علشان تقدر تطلع الكارنيه

Nadine Alfred يقول...

كارول

يا اهلا بيكى
ميرسى قوى لكلامك و مبسوطة ان الكلام عجبك
تعالى زورينى كتير
سلام يا كارو
---------
محمد بهاء

ياريت يا عم بهاء
خصوصا واحنا حياتنا كلها بقت كارنيهات فى بطايق فى ورق
و الشغل هيبقى على ودنه (نياهاهاهاهاها
---------
شادى فريد

الله الله الله
ويلكم بشباب التزوير
هو ده الكلام ولا بلاش
كويس كمان اننا هنبدأ المشروع بذوى الخبرة
عايزينك بقى يا عم شادى تدرب لنا شباب المستقبل

و بالنسبة للى حكيته عن اختك
ده كمان حصلى و انا بدفع المصاريف
بس انا سيبت الطابور و رحت للراجل فى الخزينة طلع انه يعرف واحد قريبنا
ناس واصلة بقى (نياهاهاها

سلامى ليكوا كلكوا