الجمعة، ٢٩ ديسمبر ٢٠٠٦

حدث فى لجنة امتحان

هاللوووو شباب
بصوا بقى
بمناسبة الإمتحانات اللى شغالة دلوقت
احكيلكوا على موقف حصلى فى لجنة امتحان فى آخر السنة السنة اللى فاتت

قال ايه
كان آخر امتحان
و طبعا كلنا خلاص مكناش طايقين نبص فى كتاب
بس كان عندنا إمتحان كمبيوتر
مادة كده ملهاش نجاح او سقوط
المهم
المادة بالرغم انها مش مهمة و مش فارقة معانا إلا إن لو حد سقط فيها بيضيع عليه تقدير السنة و يفضل يعيدها لحد ما ينجح فيها
و كتاب المادة دى عبارة عن كتاب من 200 صفحة مليان اوامر دوس و محدش طبعا حافظ اى حاجة فى أى حاجة

المهم
قاعدين فى لجنة الإمتحان
استلمنا الورق
و نفاجأ إن ورقة الأسئلة عبارة عن انتقام الدكاترة فينا
كأنهم بيقولولنا: ورونا بقى هتنجحوا ازاى
يعنى بالعربى امتحان ورقتين فيه ست اسئلة, كل سؤال فيه عشر نقط, كل نقطة فيها أ,ب, ج, د
بص بصراحة رغم ظروف الإمتحان إلا إن اللى حصل ماينفعش يعدى كده ببساطة

المراقب و المراقبة اللى كانوا علينا شافونا فى المنظر ده صعبنا عليهم
راحت المراقبة وشوشت واحدة من زمايلى
لقيت البنت بتطلع كتاب الكمبيوتر و بتديه للست
لقيت المراقبة راحت ناحية الحمام و رجعت ايديها فاضية
شوية و لقيت البنت راحت داخلة الحمام
و رجعت جرى على ورقتها و هاتك يا كتابة
تكرر الموقف مع ناس تانية
المراقبة توشوشهم, يقوموا عالحمام, يرجوا و الوحى نازل عليهم
لحد ما جه دورى
قالتلى المراقبة: كتاب الكمبيوتر فى الحمام, تحبى تقومى؟؟؟
بصتلها كده و انا متنحة
لا شكرا الحال ماشى
بصتلى شذرا و قالتلى انت حرة
و نقلت عاللى ورايا

بصراحة مبحبش الغش
عشان لما اجى اطلب من ربنا يقف معايا, يبقى لى عين اطلب منه
و اعتقد ان فيه كتيييييير قوى زيى

المهم
جه بقى المراقب التانى, عايز يعمل حاجة يساعد بيها طلبة مصر المحروسة
راح ماسك ورقتى
قعد يفر فيها
و البنت اللى وراه قالتله لو سمحت اجابات الصح و الغلط ايه؟
راح هو سألنى انت كاتباهم فين؟
كنت هرقع بالصوت.... بس الذهول منعنى
شديت منه الورقة و انا مش مصدقة
قولتله محلتهاش
و قمت سبتهم و قعدت قدام و انا بعيط
و للأسف مقدرتش اخد موقف او اشكى المراقبين دول لسببين:
1- الذهول و الخوف اللى كنت فيه كان اقوى من اى رد فعل
2- كان ممكن قوى المراقب يعلم عالورقة و يطلعنى انا الغشاشة
بس معلش
ربنا كبير

مكنتش عايزة اجيبلكوا اكتئاب, انا بس كنت بحكى اللى بيحصل فى اللجان
و ياما فيه حاجات أكتر من كده بتحصل


قبل ما انسى
عايزة اتمنيلكوا
كل سنة و كلكوا طيبييييييين و بخيييييييييير

هناك ٨ تعليقات:

islamz يقول...

يا بنتى لو كان عندى وقت كنت صورتلك نفسي وانا انحنى احتراما لاخلاقك اللى خلاص مش قلت لا دى تقريبا قربت تنقرض .. النغمة السائدة هى ذاكر تنجح غش تجيب تقدير .. والكل داخل الامتحان على امل انه يلقط حاجة من هنا او من هنا ..
وكأن الموضوع ده بقي شيء عادى خلاص ..

ربنا يكرمك في اخلاقك دى يا نادين ...

وكل سنة وانت طيبة وبالف صحة وخيييير ..

خللى بالك من الخروووووف .. هههه

:] سلامز

basma saghir يقول...

عجبتنيني قوي لما قلتي انك مبتحبيش تغشي علشان لما تطلبي من ربنا يقف معاكي يبقى ليكي عين
والي بيحصل ده جزء بسيط جدا من الفساد الي مسيطر على مجتمعنا مجتش على المراقبين يعني...وماخفي كان اعظم
ربنا يوفقك يا نادين وكل سنة وانت طيبة

غير معرف يقول...

بسم الله الرحمن الرحيم
سلام عليكم
بصراحة مش عارفة ااقول ايه في زمن بقي الصح فيه غلط و الغلط منتهي الصح .....يا جماعة حتي لو الناس غشت بيكون عادي و نقول عشان العجلة تمشي و الاولاد ينجحوا و ميعرفوش انهم كده"بالرغم من ان الغش مكن احيانا ينجح بالفعل " الا انهم كده بيهدمونا و يزرعوا فينا شي احنا اللي بنحصده في مستقبلنا من استسهال و استهتار و بنخد حق مش حقنا لو جبنا تقدير او نجحنا
مش هقولكم انا ملاك و مش بغش ابدا و لكن بكون عايزة اغش لاني بخاف اسقط و لكن برده بخاف من ربنا و اقول انه مش هيبركلي لو عملت كده و سبحان الله ربنا بوفق برده
المهم مش اخد حق حد
و بالنسبة ليكي عندك الف حق مش تدي الاجابة لانه مش حقهم انهم يسرقوا مجهودك و علنا كمان
ربنا يعينك في دراتك و ان شاء الله بالتوفيق و كل سنه و انتي طيبة
مها

Nadine Alfred يقول...

اسلامز

كتر خيرك بجد على الكلام الحلو ده
بس انا حاسة ان اللى قلته ده هو المفروض اللى يحصل
يعنى ده اللى انا اتربيت عليه و ده المفروض ان كل الناس تعمله

بس واضح ان الزمن غير الزمن و الناس غير الناس

ربنا يكون معانا كلنا يارب
سلام

Nadine Alfred يقول...

بيسو

فعلا
اللى بيحصل ده جزء بسيط من الفساد المسيطر
و فى الآخر كله مرتبط ببعضه
فعلا عندك حق

Nadine Alfred يقول...

مها

شكرا بجد انك سيبتى كومنت
كلامك منطقى جدا
و ياريت تبقى زياراتك كتير عندنا
سلام

Racha يقول...

Besara7a enty guade3a awy, mawkef sa3b...Da 3ala keda fe3lan koleyet handassa ar7am :)

Nadine Alfred يقول...

rubiba

عادى
اللى بيحصل ده فى كل حته
ده بقى النورمال
كمان فى هندسة على حسب ما سمعت من اختى بيبقى الغش بالتكنولوجيا