الثلاثاء، 20 مارس، 2007

مجرد رأى... عن الفيلم الإسرائيلى

بصراحة انا كنت واخدة فترة كده اجازة من التدوين
بس حبيت النهاردة اقول رأيى فى موضوع مهم

من فترة ليست ببعيدة اثير موضوع الفيلم اللى عرضته إسرائيل, و اللى فيه مشاهد لتعذيب أسرى حرب مصريين بعد حرب اكتوبر 73
و طبعا صاحب عرض هذا الفيلم كثير من صرخات الغضب و الحنق فى "الشارع المصرى" و ليست الحكومة المصرية
بل ان الثورة على إسرائيل و على بن اليعازر كانت معها ثورة و غضب على الحكومة ذاتها
طب ناخد الموضوع من الأول
دلوقتى إسرائيل هى اللى عرضت الفيلم, بمعنى آخر المجرم فضح نفسه
طب هى عملت كده ليييييه؟ و اشمعنى اليومين دول بالذات؟؟؟
الفترة اللى اتعرض فيها الفيلم اتميزت بأحداث كتيرة مهمة
منها
1- حرب إسرائيل فى لبنان, و فشلها المزرى امام الشعب و الإرادة اللبنانية
2- الإنتهاكات و التخريب فى المسجد الأقصى, واللى بسببه كثير من الهيئات وقفت ضدها فى مصر و العالم

كمان مش لازم نغفل حاجة مهمة جدا
و هو إن على مدار تاريخ مصر, و تاريخ ما تعرضت له من إساءات من بعض الدول
فرد مصر بيكون واحد و مكرر فى جميع المواقف
نقعد نزعق, و نلاقى وزير يقول هنبحث فى الموضوع ده, و مش هنقبل المساس بسمعة المصريين , و مش هنسكت... و كلام كتير كده
و هوباااااااااااااااا
الموضوع ينام
و يبقى مجرد إضافة جديدة فى ليستة الإهانات فى شهادة مصر

ممكن تكون إسرائيل عايزة تستغل النقطة دى, تقوم تذيع الشريط عشان توقعنا فى الشرك
و هى عارفة فى الآخر اننا مش هنعمل حاجة
بس هى هتكون اثبتت لنفسها انها برضه الأقوى, و الأشرس

يمكن كمان تكون بتلهينا
و محضرة لنا مفاجئة قريب

أى إن كان السبب
طبعا دماء الجنود و تمن ارواحهم لا غبار عليها
و أكيد الفيلم لازم ناخده بجدية اكبر من كده
بس برضه لازم نفهم ايه اللى ورا الفيلم
إسرائيل دولة ماكرة, مش بتعمل الحاجة كده و السلام
و أحنا كمان محتاجين تكون مواقفنا اكثر رجولة و حزم
و نحترم انفسنا عشان يحترمنا الآخرون


عموما ده رأيى الشخصى
يحتمل الصحة و الخطأ
اضغط هنا

هناك 14 تعليقًا:

بيسوو يقول...

وحشاني قوي
انتي فين بقالك كتير..مش باينة
شكلك مش تمام...عموما كلنا مش تمام وجه الموضوع ده وكمل على الي فاضل فينا
كمل على شوية التمام الي عندنا!!

الاراء كتير جدا في الموضوع ده وكل واحد بكلمة زي ماانتي شايفة بس الراي الاكثر احتمالا للصحة ان الموضوع كله عبارة عن استعراض للعضلات واثبات للقوة والهيمنة زي مايكونوا بيقولوا
ايوة احنا قتلنا مصريين بطريقة وحشية ومش هتقدروا تعملوا حاجة..هنقعد نزعق شوية..ونهلل حبتين..وكان الله يحب المحسنين

maha يقول...

سلام عليكي يا نادين
يااااااه
حمد لله علي السلامة
انتي فين يا بنتي

موضوع جامد
تعرفي اني كنت لسه بفكر في الموضوع ده انهارده؟؟؟
اشمعني اليومين دول بالذات انهم يعرضوا حاجة زي كده؟؟؟؟

بس يمكن لسبب اهم من الحكومة

الشعب نفسه
الناس دلوقتي مفيش حاجة مش بيشتكوا منها اكل و شرب المية و اللبن غلاء الاسعار بشكل عام مشاكل امن الدولة و التعذيب
فيبقي اهانة من الخارج و الداخل
تفتكري؟؟؟
مش عارفة
بس الايام هتوضح السبب

*نادين ممكن طلب مهم جدا؟؟؟ممكن تشيلي موضوع الحروف اللي بننقلها قبل ما نوافق علي ارسال التعليق

عودة قوية يا نادو
سلام يا جميل
مها

The Alien يقول...

هما عارفين إن مفيش حاجة هتحصل
طب ما هما بيعملوا أكتر من كده كل يوم
ومفيش حاجة بتحصل ولا حد بيتحرك
دي لعبة سياسة قذرة

تحياتي

إبراهيم يقول...

رأيك صائب جداً إسرائيل بتحاول ترد اعتبارها وترجع صورتها زي الأول بعد ما اتهزت بعد غزو لبنان الأخير.. واحنا كالعادة حكومة جبانة وشعب ربنا ياخد بإيده

انا معاكي في رأيك بس مصر مش دولة ضعيفة مصر دولة مبتتحركش إلا في آخر لحظة والبلد مش هتتعدل إلا لو احتلت

ده رأيي برده
سلام

tamer يقول...

انا معاكى فهى دولة شيطانية وكل حاجة عندها بيكون بحساب وعارفة امتة تقول وامتة تنفى

عارفة انهم نشروا شريط جايبين فية جنور ايام حرب 73 وقالوا ان جبش مصر كان بيعذب الاسرى اليهود وقتل المئات منهم


رسالة من الشريط دة يعنى عايزين يوصلوا لينا

ان دى صفحة وانتهت وكل طرف غلط فى حق التانى وخلاص بقى صافى يالبن


مع ان لو رجعنا وشوفنا وفكرنا اشمعنا الشريط دة ما ظهرشى الا بعد الضجة اللى حصلا من شريط تعذيب وقتل المصرين


الموضوع عايز وقفة صح والحق عمرة ما يضيع بس عايز اللى يطالب بية مش يدفنة ويعمل نفسة انة مش شايفة حاجة

تحياتى

micheal يقول...

ده كله شغل سياسه يا نادين...هما واثقين مليون في الميه أن حكومتنا الرشسده لن تحرك ساكنا...هم أرادوا توصيل رساله لنا بأنهم الاقوي و الاشرس في المنطقه و بالمره تصدير القلاقل و الفتن لدينا بين الحكومه و جبهات المعارضه الداخليه و أهو كله مصلحه ليهم
تحياتي لكي

محمد صلاح العزب يقول...

ماشي وبعدين؟

nadine يقول...

بيسوو

انت كمان فعلا وحشانى
كنت بمر بفترة مش لطيفة كده
بس الحمد الله احسن دلوقتى

هو غالبا زى ما بتقولى
استعراض عضلات

nadine يقول...

مها

الله يسلمك يا جميل
انا كمان الحكاية كانت فى بالى من فترة
فاقلت اجى اتناقش فيه هنا

بالنسبة لحكاية الحروف
انا شيلتها خلاص يا ستى
انتى تؤمرى

ماتقطعيش الزيارات يا مها
سلاام

nadine يقول...

the alien

هى فعلا لعبة سياسة قذرة
و حركاتها محسوبة
--------
إبراهيم

انا ماقلتش اننا دولة ضعيفة
بس إحنا بنضعف نفسنا
و بنسيب حقوقنا مع الدول التانية
زى ما إحنا اصلا كشعب دايما سايبين حقنا
اما بالنسبة للإحتلال
فيارب مانوصلش للمرحلة دى
عموما إحنا كشعب أعتقد اننا بدينا نصحصح
و نرفض اوضاعنا
كفاية إن بقى فيه إضرابات فى المصانع عالحال المايل
يارب بس نفوق بجد

nadine يقول...

tamer

كله كوم
و الشريط اللى طلعوه عشان يقولولنا ان فيلمهم ده رد على معاملة جنودنا لأسراهم كوم تانى

بجد حاجة تفقع
-------
micheal

هم كل مرة بيستفزونا على حاجات غريبة
و إحنا كل مرة بتخدع و بنجرى ورا كلامهم
و بننشغل عن مصايب تانية اكبر بتحصل قدام عينينا و مش بنشوفها

nadine يقول...

محمد صلاح

ممممممم
كل ما فى الموضوع
انى كنت عايزة افهم الموضوع كويس
و كمان اقول رأيى

الدبور يقول...

خلاص احنا اتعودنا علي الاهانه و الذل ويوم ماتقوم لنا قومنا نقول بالصوت العالي نحن نشجب و نستنكر وندين
يا خيبتك بالقوي يامصر ويا حكومه جواسيس
و اللهم ولي امورنا خيارنا

تحياتي
الدبور

nadine يقول...

الدبور

إحنا إتعودنا عالكلام
بقى عندنا الرد البليغ بالكلام
عشان كده امم بتقوم و بتتقدم
و إحنا محلك سر
و لسه عمالين نتكلم