الثلاثاء، 27 مارس، 2007

مصدومة



خبر صغير نشر فى آخر صفحة فى المصرى اليوم بتاريخ 07-3-26
الخبر ببساطة بيقول التالى:

عمال المعاش المبكر فى الترسانة البحرية يحتجون على إهذار حقوقهم بتأييد التعديلات

«٢٥٠» من عمال المعاش المبكر البالغ عددهم «٣٥٠٠»، نظموا تظاهرة أمس أمام مبني الترسانة البحرية في الإسكندرية، احتجاجاً علي عدم تنفيذ حكم هيئة التحكيم، رقم ٣ لسنة ٢٠٠١ عمال، كلي من محكمة استئناف الإسكندرية بأحقيتهم في ضم العلاوات المقررة، واحتساب المقابل النقدي لبدل طبيعة العمل، منسوباً إلي أجورهم الأساسية بعد زيادة هذه العلاوات المضمومة منذ ١/١١/١٩٩٢، وفي الوقت ذاته، رفع المتظاهرون لافتات تأييد للتعديلات الدستورية.

يقول عثمان حواش عامل بورشة (١): إن رئيس مجلس الإدارة طعن علي الحكم بالنقض برقم ٢٢١٣/٢٣٥٣ لوقف تنفيذ الحكم بصفة مستعجلة، ولم ينفذ من الحكم إلا «العشر».
......

العجيب في الأمر أن المتظاهرين رفعوا لافتات تؤيد التعديلات الدستورية الجديدة، بدلاً من اللافتات التي تعبر عن مطالبهم، التي تظاهروا من أجلها.

------------

و على كده انتهى الخبر

بقدر ماهو بقى عادى جدا اننا نشوف عمال بيتظاهروا عشان ياخدوا على حقوقهم

بقدر ما أفزعتنى الطريقة اللى تظاهر بيها عمال الترسانة

للأسف ماقدرش الومهم

و بالرغم من إنه بقى عادى انك تسمع ان الحزب الوطنى بيدى خدمات و مكافئات للى يسمع الكلام

بس التصريح بالخضوع و الخنوع بالشكل الفج ده عشان بس الواحد ياخد حقوقه ده اللى مصيبة

و اعتقد انه هتظهر كثير من المظاهرات المؤيدة لناس عايزة تاخد حقوقها

و برضه مانقدرش نلومهم

و زى ما بيشوى قال

"الشعب المصري كله مزنوق ف أول درجة من درجات الهرم
يعني كله بيدور علي الأكل واللبس والسكن
كله مزنوق ومحدش عارف يطلع لفوق
الوضع ده مقصود ومجاش بالصدفة
"

و ده حقيقى

بس للأسف

دى لوزة مقشرة يهديها الشعب للنظام الحاكم

مستعدين نعمل اى حاجة و نوافق على كل طلباتكم

بس أدونا حقوقنا اله ما يوقعكم فى ضيقة


خلص الكلام.

هناك 21 تعليقًا:

The Alien يقول...

الخبر ده فيه حاجتين
حاجة تفرح إن بقي عندنا ثقافة تظاهر وإضراب
وحاجة تحزن
والحاجة اللي تحزن هي موضوعنا
الناس بتدور علي أكل العيش
وشافوا إن تأيد الدستور هيحنن قلب الحكومة عليهم
زي ما قلتي
هنوافق ونعمل الي إنتوا عايزينه بس أكلونا

ساعات بقول الناس معزوره
وساعات أقول إحنا اللي نستاهل

تحياتي

Amr Ahmed يقول...

نياهههههههههههها

لا ياشيخة دي اكيد نكتة

اكيد بيهزروا

مايهزروا براحتهم

ماهي خربت اصلا

DR.SHERBO يقول...

طبعا حاجة تقهر
تحبي أقولك حاجة تقهر اكتر

90% من الناس اللي راحو الاستفتاء موظفين رايحين عشان ياخدوا بقيت اليوم اجازة

انا شفت بعيني الموظفين بيطلوبوا يروحوا
يعني مستقبل البلد كله متوقف على كام ساعة اجازة

smraa alnil يقول...

حسبي الله ونعم الوكيل
افرجها من عندك يااااااااااااااااااااااارب

safa7_karmooz يقول...

انا مش فاهم حاجه من الصوورة خالص ومش عارف ااجمع الخبر ....

بس عامة كلنا بقينا كده ...عاوزين الاكل الاول ...وعيالنا تتستر ...ومحدش يحتاج حاجه من حد تانى....

بس هنوصل لمرحلة مافييش حاجه...ودى هتبقى الثورة ...حتى يحدث هذا...ادينا قاعدين..:)

micheal يقول...

بجد يا نادين الواحد مش عارف يضحك و لا يعيط علي الخبر ده...ألناس فعلا بقت بتحارب و تناضل عشان لقمه العيش و محدش فاضي يلتفت لاي حاجه تانيه...للاسف نجحوا في هذا الغرض تماما
تحياتي لكي

شادي فايد يقول...

هههههههههههههه

ألف سلامة عليكي من الصدمة

islamz يقول...

خربانة خربانة .. خلينا ساكتين

وكل سنة وانت طيبة يا نادو بمناسبة المولد النبوي الشريف

إبـراهيم ... معـايــا يقول...

سلاااااااااامتــــك من الصدمة صحيح يا نادووو ....، بقالي كثيير ما عديتش من هنا


معلش إنتي عارفة بقى الدووونيـــــــا تلااااهي !


ما قلتليش ، أخبار الكتـاب إيه صحيح ؟؟

مبرمج حر يقول...

I tagged you

raspoutine يقول...

انا معرفش انك ليكى فى الساسة يا نادو
بس مين عثمان حواش ده
هوا ده بتاع شيلنى يا حواش

nadine يقول...

أسفة جداااااااااااا على التأخير فى الردود
بعيد عنكوا كان عندى إمتحانات و حاجات كتير حلوة كده
دا غير إنى كنت بتعالج مالصدمة

يلا مش مشكلة
حصل خير

----------
the alien

طب بجد نفسى فى سؤال
إزاى نطلع نفسنا من الدايرة اللى عمالين نلف فيها دى؟؟؟؟
----------
amr

هى نكتة
بس نكتة بايخة قوى
----------
dr,sherdo

اه
قريت الخبر ده فى الجرنال
عاتشى يعنى
ماهى من زمان وهى خربانة
شكرا ليك

nadine يقول...

samraa

يسمع من بقك ربنا
--------
safa7

الصورة دى صورة العمال ساعة التجمهر أو الإعتصام اللى كانوا عاملينه
و الموضوع هتلاقيه على موقع المصرى اليوم بتاريخ 27/3/07
--------
micheal

لا هنضحك ولا نعيط
إحنا قريب قوى هنشوف العجب
و النجوم فى عز الضهر

nadine يقول...

شادى

أدينى اتصدمت واللى كان كان
-------
اسلامز

شكرا ليك على جرعة التفاؤل
و كل سنة و انت طيب
-------
ابراهييييم

ايه يا سيدى
دا انت عليك مخالفات قااااااااااد كده
ناسينا خالص ولا سلام ولا كلام
ماشى يا سيدى
ربنا يعينك
مبسوطة بمرورك
و انشاءالله هكتب بوست عن الكتاب
يلااااا يا سيدى
إنشالله ما حد حوش

nadine يقول...

مبرمج حر

thank's for the tag
---------
raspotine

هو انا فعلا ماليش فى الساسة دى ولا عمرى سمعت عنها أصلا

عثمان حواش ده بتاع حوش يا حواش

محمد العنانى يقول...

حسبنا الله ونعم الوكيل
فى الضالمين
مهى النتائج هتظهر يوم بعد يوم
واحنا الوحدين الى خسرنين فى الكلام ده

إبراهيم محسن يقول...

يا خبر أبيض؟
ايه ده.. الناس من حبهم في مبارك وفي الحكومة نسيوا نفسهم.. الحمد لله الشعب واعي وعارف هو عاوز ايه.. ونحو مزيد من الديمقراطية ... قررنا قتل أفراد الشعب بتنصيب جمال ابن جلالته رئيساً للجمهورية المصرية العربية الديمقراطية.. بس خلاص كبري دماغك بقى

REEMOO يقول...

هم يبكى وهم يضحك
مدونتك جميله يا قمر
تحياتى ليكى:)

الأباصيرى يقول...

هى دى الديمقراطية اللى بنحلم بيها كلنا


مكدبش سيد درويش لما قال
وعشان مانعلى ونعلى ونعلى
لازم نطاطى نطاطى نطاطى

raspoutine يقول...

انتى فييييييييييييييين
مش كفاية كده ولا ايه؟؟؟؟

The Alien يقول...

فينك يا بنتي؟
مختفية ليه؟
أتمني تكوني بخير وترجعي بسرعة

تحياتي