الأربعاء، ٢٧ فبراير ٢٠٠٨

ما بعد الإفاقة

1- حاسة انى كبرت فى شهر اللى كان المفروض اكبره فى سنييييييييييين.
أُفاجأ بانه مطلوب منى اكون مُلِمة بحاجات و امور كتيرة و مختلفة، و انى المفروض اعتمد على نفسى و اتفطم فى الحال.

2- كانت اول مرة اصلح فيها حاجة فى الكهربا. و برغم انى كنت مرعوبة بس لبستلهم وش خشب و حسستهم كأنى متعودة عالحاجات دى. بس لا اراديا كده، افتكرت فى الحال منظر ابويا وهو بيظبط فى الاسلاك، عملت زيه، و عرفت اصلح اللى كنت بعمله.
اكتشفت ان كل حاجة عملها، حتى لو كانت عدت منغير ما اديها اهتمام، بس اكيد هى متخزنة جوايا.

3- من ضمن الذكريات الكتيرة اللى بقت تظهر فى دماغى زى فلاشر الكاميرا، افتكرت قد ايه كان ابويا موسوعة متنقلة. كان استحالة تقريبا اسأله عن حاجة و مايعرفش يجاوب، لدرجة انه كتير جدا كان بيبقى عندنا احساس قوى انه لو اشترك فى من سيربح المليون، اكيد اكيد هيكسب المليون.

4- لحد دلوقتى مش قادرة اضيف صفة مرحوم لإسمه.

5- بشكل او بآخر حاسة انه لسة موجود وسطينا..... بمعنى انى مش بفكر فيه من وجهة نظر انه مات... لأ، بحس انه مسافر فى سفرية من سفرياته للصعيد و راجع كمان اسبوع.

6- لم يكن ابى من النوع "الرغاي"، لذلك ماكنانش بيبقى فى بينا حوارات كتيرة و لكن ذلك لم يمنع احساسنا بحبه و خوفه علينا. إلا انه بعد ما دخلنا الجامعات، و بعد ما خلصنا من هم المدارس و الثانوية العامة، شوية بشوية احنا كبرنا و شوية بشوية اصبحنا اصدقاء.
و دلوقتى اقدر اقول انه كان صديقى قبل ما يكون ابويا.

7- إحساسنا بالألم انا و إخواتى خلانا نحِن على بعض. بعد ما كنا ناقر و نقير، اصبحنا قريبين من بعض، بنتبسط من مجرد وجودنا مع بعض، مابنحسش بالدفا غير لما نتلم كلنا ووقتها بس بنحس بوجود ابونا حوالينا.

8- واحشنى قوي. إتصرف بقى.. يا انت تجيلى .. يا انا اجيلك.

هناك ١٢ تعليقًا:

basma saghir يقول...

كويس انك بتكتبي علشان انا بجد مفتقداكي جدا هنا

بحبك وانتي عاملة فيها قوية لان شوية بشوية هتبقي كدة فعلا.....

احلى حاجة في الانسان انه بيتكيف على الاوضاع الجديدة مهما كانت صعبة ومرة..ومهما كان حاسس انه مش هيقدر يكمل للاخر

يارب يانادو تلاقي الخير دايما وفي كل خطوة

micheal يقول...

ربنا يصبرك...استمري في كتاباتك لانها كده حتساعدك تطلعي اللي جواكي

غير معرف يقول...

نادو يا حبيبتى
انتى ماغلطتيش لما قلتى انك حاسه بوجود باباكى ماعى ووسطكو
هو فعلا كده عايش معاكو وجوا قلوبكو
وحاسس بيكو وشايفكوا من مكانه
اقرب ما يكون
الخبرات اللى انتى بتكتسبيها دلوقتى ,متأصله جواكى من زمان
يمكن لما الحاجه دعتك انك تمارسيها ظهرت على السطح
انا واثقه ان باباكى فخور بيكى
خليكى قويه..

mariam يقول...

حبيبتى نادين
انا مش هقولك كلام من اللى مالوش لازمه
انا حاسه بيكى و كلامك بيألمنى قوى يا نادو
بس اللى المنى اكتر لما قلتى يا تجيلى يا اجيلك
انا عارفه شعور انك مش قادره تقتنعى بحاجه حصلت لأنها فوق استيعابك
مش قادره تقتنعى بوفاته الله يرحمه
بس انتى عارفه يا نادو انهم بيحسوا بينا
يعنى اكيد هو مبسوط لما بتكونى مع اخواتك و بتحبوا بعض

ادعيله و صلى له يا نادو
المهم يكون هو مبسوط فى العالم الآخر
لأن اكيد ربنا ارحم مننا كلنا
شدى حيلك و خدى بالك من اخواتك

يا ريتنى اقدر اقدم لك حاجه حقيقيه يا ندو

YHYيــوســف الـمصـرى يقول...

السلام عليكم ورحمة الله وبركاته
...........................
الله يرحمه
ولدى كان ذكرى وفاته الرابعه الشهر الى فات .. معرفتش اكتب زيك كده !
الله يرحمه ويرحم ولدك

الأباصيرى يقول...

يانادوو ياجامد

معلش لازم الواحد يتكيف مع حياتة الجديدة
وكويس انك قادرة تتحملى المسئولية وتتكلمى عن اللى جواكى من غير ضعف

ربنا يرحمة وطولة العمر ليكى يابت
:)

---------
ابقى زورينى فى مدونتى.. انا رجعن
:D
----------

عين فى الجنة يقول...

nice blog

شيتوس الاهلاويه اووووي يقول...

هاااااي
اول حاجه عايزه اقولهالك ربنا يديكي طوله العمر .
تاني حاجه:انتي بجد انسانه رقيقه وحساسه اوووووي .وبجد اصعب حاجه فراق الاب وخاصه لما يكون كان في صداقه زيك كده.بس ده قدر ربنا وصدقيني ربنا مش بياخد الا الناس اللي بيحبها واكيد ابوكي كان يستاهل حب ربنا ليه كل اللي المفروض انك تعمليه انك كل ماتفتكريه تقريله الفاتحه وتدعيله وكمان تعملي اللي يخليه مايزعلش منك ويكون مرتاح في قبره وبلاش بقا يانت تجيلي يانا اجيلك دي ربنا يديكي طوله العمر ويخليكي انتي واخواتك لبعض ومايبعدكوش عن بعض وبحييكي لتاني مره علي البوست الجميل اللي كله احساس ومشاعر انسانه فعلا جميله اوووووووي.
اسفه لو كنت صدعتك بس بجد كلامك شدني وانا والله لحد دلوقتي مش عارفه اكتبلك ايه .عموما سعدت جدا بمروري علي مدونتك واتمني تدوم الصله بيننا .
اختك شيتوس

islamz يقول...

ازيك يا نادين .. ربنا يرحم والدك باذن الله كلامك مؤثر جدا .. وحبك واضح لكل عيلتك .. ربنا يخليكوا لبعض .. ويهون عليكوا ..

غير معرف يقول...

الأخت صاحبة المدونه
تحيه طيبه وكل عام وانت بخير وصحه وسعاده انت والأسره
نحن اول برنامج أذاعى فى الشرق الأوسط عن النت والمدونات ويذاع من أذاعة مصر الرئيسيه يوميا صباحا عدا الجمعه ويعود بعد العيد ان شاء الله
مررنا بمدونتك بالصدفه ووجدناها الحقيقه جديره بالأهتمام...وتستحق ان نشير اليها فى برنامجنا الأذاعى ..لأن بها فقرات يمكن ان تكون موضوعا لحلقات فى البرنامج ...نرجو الا يكون لديك مانع...ثانيا يسعدنا ان تشاركى انت وزوار مدونتك بالراى فى الأسئله التى نطرخها فى مدونة البرنامج وتكون هذه الآراء موضوعا لحلقات فى برنامجنا
المدونه
http://netonradio.blogspot.com
وموقعنا وبه كافة التفاصيل
http://dear.to/cairo

سابرينا يقول...

فكري فيه قبل ما تنامي
علشان يجيلك في الحلم
and alwasy remeber he feels 4 u

Unknown يقول...

شركة تنظيف بالدمام
شركة تنظيف منازل بالدمام
شركة تنظيف فلل بالدمام
شركة تنظيف شقق بالدمام
شركة تنظيف مجالس بالدمام
شركة تنظيف موكيت بالدمام
شركة تنظيف سجاد بالدمام
شركة عزل اسطح بالدمام

شركة الصفرات لتنظيف المنازل