الاثنين، 4 ديسمبر، 2006

أممكن؟؟؟

الساعة عشرة الصبح
انا فى الكلية
مفيش محاضرات النهارده
برغم إن مالينى إحساس بالكآبة و التعب و الإرهاق من كل اللى حوالى
و ماليش أى نفس أروح البيت و انا فى الحالة دى
إلا إنه مفيش حل تانى
غير التوجه للبيت

و انا فى الميكروباص
الراجل بينده
عباسية رمسيس عباسيةرمسيس رمسييييييييييييييييييس
إيه ده
انت رايح فين
رمسيس يا آنسة

يكونش انا سمعت غلط و ركبت؟
معقول؟؟؟
يكونش سمعت صح و برضه ركبت؟
مش عارفة ليه متكلمتش
مش عارفه ليه ماقلتلوش نزلنى لو سمحت
حسيت إن ركوبى الميكروباص ده مش مجرد صدفة
حسيت إنه مش مجرد غلطة
تكونش دى إستجابة من ربنا؟؟؟
مش انا اللى كان نفسى من فترة طويلة اروح إسكندرية و ارجع آخر اليوم؟؟؟
أروح عشان بس أطل عالبحر؟؟؟

بصراحة مكدبتش خبرو عملت فيها عبده العبيط
نزلت فى محطة مصر
و مشيت زى البنى آدم المتبرمج ناحية مكان التذاكر
و قطعت تذكرة فى القطر الفرنساوى

مرت حوالى نصف ساعة, بعدها منت قاعدة فى كرسى جمب الشباك
و القطر بدأ يتحرك
قلت أكلم خالتى
ألو
انا جايالك يا طنط
جايالى فين يا ماما؟
جايالك إسكندرية

حبة كده و بعت رسالة لمامتى اقولها انا فى مشوار ماتستنونيش عالغدا

مرت تلات ساعات و كنت فى اسكندرية
سبورتنج ياسطى من عند الكورنيش
و وصلت سبورتنج
و قابلته
شفته
هو بعينه بلونه بموجه الابيض
و استقبلنى بريحة يود جميلة مليت بيها رئتاى
اصل الهوا ده مش بنلاقيه عندنا نحن معشر القهراوية
حسيت إنه كان مستنينى
-إتأخرتى عليا ليه؟؟
-معلش, صدقنى بقالى كتير نفسى اشوفك
و قعدت على صخرة
و فضلت ابصله
بنتكلم بالنظرات
مادريتش بالدنيا غير لما اتنين حبيبة جم قعدوا جمبى و صوتهم كان عالى
الظاهر كانت الخناقة على الخطوبة
ببص فى الساعة
يانهار أسود!!!
دى الساعة بقت خمسة

زى الشاطرة
نطيت فى أول تاكسى لقيته
محطة سيدى جابر ياسطى
و ركبت قطر القاهرة
طبعا كانت الدنيا ليللت لما وصلت
بس مكانش هاممكنى حاجة
كنت مبسوطة
مرتاحة
مرتاااااااااااااااااااااااااحة


"طبعا لو كانت كل همومنا بسيطة لدرجة إنها بتنتهى بمجرد ما ننساها, كانت تبقى الحياة غير الحياة و الدنيا غير الدنياو كانت تبقى عيشيتنا كلها بمبى و ورد و فل"

طبعا اللى مكتوب فوق ده مجرد حلم ناتج عن رغبة فى الهروب كامنة فى العقل الباطن نتيجة الإحتكاك بالواقع المليئ بالمشاكل التى هى سببها الإنسان نفسه...
مش ده اللى قالوهولنا فى علم النفس؟؟؟؟

هناك 11 تعليقًا:

Amr Ahmed يقول...

هاي نادين

اولا ابوس ايدك بلاش تتكلمي عن علم النفس لاني بقالي 3 سنين بشيله يعني بقي عقدتي
بس بصراحة بقت عشرة بيني وبينه

ثانيا البوست اكثر من رائع انا اعتقدت انه بجد


بس تعرفي انتي طلعتي الفكرة في دماغي وايه يعني يوم يبقي ويوم جامد

واجابة السؤال ممكن طبعا


وبعدين انا حاسك في حالة نفسية مش تمام ,فكي بقي علشان الامتحانات ربنا معاكي ومعانا

بس انا فرحان اني اكون اول واحد عمل كوممينت عندك

باااااااااي نادو

nadine يقول...

عمر
ازيك يا زميل؟؟
بجد مش عارفة اشكرك ازاى على الكلام الحلو ده

انا فعلا بمر بحالة نفسية وحشة
و فعلا نفسى اروح إسكندرية بأى شكل
بس طبعا زى ما انت عارف انا إبتديت إمتحانات خلاص

فا كل اللى فى إيدى دلوقت إنى أذاكر غصب عنى عشان الشهر ده يعدى على خير

إدعيلى
و شكرا بجد على ردك, يارب على طول كده دايما ردودك الجميلة
سلام

المهــــاجر المصـــــــرى يقول...

اسكــــــندريه نورت يا ستى

nadine يقول...

يا اهلا يا اهلا بيك يا مهاجر
واضح انك قاعد سهران برضه :)

ربنا يكرمك بس انا برضه لسه ما رحتش إسكندرية
اصله موسم إمتحانات بقى و كل عام و انتم بخير

عموما شكرا جدا انك مريت علينا
و خلينا نشوفك دايما
سلام

المزاجنجي يقول...

اهلا اهلا ..... تسمحي لي يالاغنية دي ؟؟؟؟؟



وسعوا من وش العقلاء لاء لاء
اربط فرمل يا سواء واء واء



بجد انت عسل

أنـــا حـــــــــرة يقول...

كده تطلعى بتحلمى
وانا اللى قلتالبت طلعت مجنونة بس جدعة و سافرت اسكندرية لوحدها


عموما الحلم بيشيل كتير من ع الواحد

nadine يقول...

المزاجنجى

اغنية جامدة مع إنى أول مرة اسمعها
و صوتك كمان طلع حلو (هاهاهاها

مدونتك جميلة قوى

-----------
انا حرة

للأسف فعلا انا كنت بحلم
و يومها وقعت من عالسرير حتت واقعة

ايييييييييه
دنيا
بس انا انشاءالله قبل 2010 هكون رحت إسكندرية
:)

بجد إدعيلى السنة تعدى على خير عشان اعرف اسافر

يلا سلاااااام

Utopian يقول...

:)

heya fekra gamnda...sa3at so7abi yroo7o yet3asho samak fi eskendria w yerga3o..bass ana bakabbar

bass bsara7a 7ayat el tar2a3a gamda...bass mesh 3ala tool

islamz يقول...

ايه الافكار الجهنمية دى .. بس تصدقى فكرة حلوة .. بس انا مش محتاجها .. عارفة ليه . علشان انا دراستى بره القاهرة .. انا عايش فى القاهرة لكن دراستى فى الاسماعيلية .. يعنى عندنا قناة السويس برده واهو كله ميه ..

بس شعور الحرية والنظر فى البحر الى مالا نهاية على صفحته الزرقا شعووور رائع وجمييييل ...

فكرتينى باسكندرية :]

بيسوو يقول...

ياسلام يانادين على الحلم ده ..على فكرة
هي اسكندرية بقت حلم صعب المنال قوي للدرجة دي ؟
فكرتيني اسكندرية..بس رايحالها بعد الامتحانات بعيد عن السامعين بذاكر
سلام يانادووو

nadine يقول...

يوتوبيا

تصدق فكرة برضه
الواحد يروح يتعشى سمك و يرجع القاهرة مشى
عشان يهضم
--------
اسلامز

يا بختك يا عم
البحر على طول فى وشك
عقبال ما فى يوم كده اعيش انا كمان فى حتة جنب البحر
---------
بيسوو

هى مش صعب المنال ولا حاجة
بس انا كان نفسى اعيش هناك
و كان نفسى الكلية تكون هناك
هى دى الفكرة مش اكتر