الاثنين، ١١ ديسمبر ٢٠٠٦

وصلت بيتنا سليمة....احمدك ياااااارب

حمدالله على سلامتى
فضلت اقول الجملة دى كتير لنفسى و انا مش مصدقة إنى وصلت البيت سليمة
هو المفروض يعنى انه انا كنت فى الجامعة, أى انه يكون يوم عادى جدا
بس النهاردة ماكانش يوم عادى بالمرة

نازلة الصبح عندى امتحان الساعة 9
نازلة من بيتنا 8 و تلت, عادة السكة بتاخد نص ساعة
ركبت الميكروباص
و السكة واقفة
المهم وصل الميكروباص قدام الكلية
و إذ بى أفاجاء بحاجة عاملة زى غطا العربية مرمية على الأرض و حاطين حواليها كراتين كبيرة عشان محدش يقرب
و بفضول كده كنت ببص ايه ده
طلعت جثة لشخص مجهول دمه سايح عالارض,مات تحت عجلات الاتوبيس
...........................
طول عمرى اشوف الحاجات دى فى الجرايد فى التلفزيون
بص انى اشوفه كده عينى عينك مفيش بينى و بينه نص متر
دى اللى كانت جديدة و مؤلمة قوى عليا
لقيت نفسى بعيط مع إنى معرفوش
بص الموقف كان صعب

(يا ايها الرجل ياللى معرفش حتى اسمك,ياللى مات تحت عجلات الاتوبيس النهاردة الصبح قدام عينى
الله يرحمك و يرحمنا جميعا)

لكم ان تتخيلوا ان انا بعد الحكاية دى كلها كنت داخلة على إمتحان نص سنة
طبعا إجابات فل الفل و التركيز كله كان فى الإمتحان

و خلص الامتحان
و قلت اللى حصل حصل
انسى يا بنتى و كملى يومك عادى و لا كأن فى حاجة حصلت
اوووووووووووووووووووك
شوية كدة
وطلعت من الجامعة

كان ورايا مشوار
و انا ماشية فى الشارع
عدى من ورايا اتوبيس كان هيشلنى فى سكته
طبعا افتكرت كل اللى حصل للراجل و جه فى بالى منظرى و انا مرمية زى الراجل اللى مات

رجلى سابت و حسيت إنى هقع من طولى
قلت ما بداهاش
هروح النهاردة و الحمدلله اليوم على كده

ركبت التاكسى
و الشارع واقف على غير العادة
اتارى قدام عربيتين دخلوا فى بعض و واحدة منهم بقت عجينة

يا لهويييييييييييييييييييييييييى
طلبت من السواق يوصلنى لحد باب البيت
و طول السكة كنت قاعدة مغمضة عينى
لحظة ما دخلت باب الشقة
اترميت على اقرب كنبة
و قلت لنفسى
حمدالله على سلامتى

هناك ١٢ تعليقًا:

Amr Ahmed يقول...

الف الف الف حمد ا لله علي السلامة

وربنا مايوريكي اي حوادث ولا اي حد مننا ولا اي حد يارب

مافيش احسن من الموت في البيت


بس المهم تركزي في الامتحانات


ايه الاخبار معاكي بس انتي بداتي ازاي


مش انتي تربية برضو

بداتي بدري كده ازاي


المهم ربنا يوفقك

وايه اخبار التربوي معاكي


ربنا معاكي ومعانا

Nadine Alfred يقول...

عمر
ازيك
الله يسلمك يا رب و ما يوريك اللى شفته
انا اليومين دول بمتحن الحاجات العملى و المعمل
امبارح ده كان علم نفس معمل
بس الباقى لسه, التقيل جاى ورا
يارب السنة دى تعدى على خير لينا كلنا
سلام

Ramy Emil يقول...

hi nado ..
esma7eely 2a2olek 7aga

fel balad de , kol 7aga bete3'la ,, kol yoom ,, w kol yoom el ensan beyer7'as

Howa da el Egyptology 3alla 7a2


Good luck in your exams ,, wel madrasa el 3agiba de :D

أشرف حمدي يقول...

بيقولوا النزول من البيت مغامرة . لو تلاحظي اغنية ام تي ام اللي بتقول :
ممكن تنام ماتقومش ممكن تنزل ماتروحش!
بعد الشر طبعا . بس الشارع المصري مابقامش آمن خالص .
ربنا يستر علينا جميعا .
انا نازل الشغل اهوه . ادعولي ارجع بالسلامة :)

وجع دماغ يقول...

أولا رحمة الله على هذا الرجل

أحيانا بحس أن الموت ممكن يكون قريب أوى وأنا مش واخد بالى

بس لو فكرت كده مش حاعيش
حاعما اللى عليه وأراعى ربنا وأستمتع بحياتى
وربنا يكرم

Nadine Alfred يقول...

رامى

كلامك صحيح
دا الراجل كان مرمى فى الشارع بينزف و دمه بيجرى عالأرض و مجدش عمله حاجة
ربنا معاك انت كمان فى امتحاناتك

------------
اشرف باشا

يا أهلا بيك فى مدونتى المتواضعة
وجياتك مفيش مكان فى مصر بقى آمن و أولهم طبعا الشارع
تروح و تيجى بالسلامة يا فنان

------------
وجع دماغ

مبسوطة قى بمرورك عندنا
مدوتك حلوة فعلا و مواضيعها قوية
ايقى زورنا على طول

و ربنا يرحمنا جميعا

سلام

islamv يقول...

الف حمدلله على السلامه يا نادين .. معلش بقي قدرك انك تشوفى المنظر ده ..
طب تعملى ايه بقي فى الفليسطينين اللى بيشوفوا المنظر ده كل يوم وكل سعة ومع اقرب الناس ليهم ..

انا هسكت بقي عشان مخرجش عن الموضوع .. انا بس حبيت اقولك الف سلامة عليكى .. وربنا يوفقك .. :]

Nadine Alfred يقول...

اسلامز

النقطة اللى ذكرتها فعلا مهمة
يعنى انا لما شفت الموت قدامى اعتبرته "حادث"
إنما فى ناس الموت بقى هو حياتهم
و طبعا انك تعيش منتظر الموت ده من اسوأ انواع الحياة
بل ان الحياة فى الحالة دى بتبقى موت


بتمنى ان محدش يضطر يشوف الموت بالطريقة دى ولو للحظة فى حياته

غير معرف يقول...

والله قلبي وجعني



الحمد لله على السلامة

Nadine Alfred يقول...

اكتب بالرصاص

آسفة بجد انى وجعتك
بس كنت عايزة اكتب اللى حصل قبل ما اتجنن
و زى "وجع دماغ" ما قال
لو قعدنا نفكر كتير مش هنعرف نعيش

معلش

غير معرف يقول...

الف حمد لله علي سلامتك
يا بنتي ربنا ما يوريكي البهدلة بتاعة الاحياء في الشارع فما باللك بللي يموتوا فيه
عارفة الموضوع ده فكرني بالناس اللي في الشارع ليل و نهار "ولاد الشوارع "و لا المفروض ااقول سكان الشارع
و بالحديث عن الامتحانات اظاهر ان كلنا تربية و ربنا معاكي في امتحانات علم النفس و مبادئ التدريس و الكلام الكبير الصعب ده
سلام و الف سلامة
مها

قسما سأنتصر يقول...

دلوقتى افتكرت كلمة واحد قالهالى
اصل احنا كتيرر وببلاش
اه يا بلد ارخص ما فيكى الأنسان