السبت، ١٠ مارس ٢٠٠٧

فى كافيه الإبداع... و قعدة ماتتعوضش

ياااااااااااااااااااااااااااه
اخيرا شفتهم
و على قد ما كنت خايفة
متوترة
و محرجة من انى اجى
بس بعد كده
فرحت بالناس اللى قابلتهم
و ناس كتير منهم كنت اعرفهم من خلال التدوينات
عرفتهم على الطبيعة
شخصيات من ارقى ما يكون
و بجد كانت قعدة جميييييلة جدا

فى الأول ما كنتش عارفة الكافيه فين
و فضلت الف و ادور
بعدين لمحت لمة كبيرة بعيد
قلت يبقى اكيد هم دول ولاد مصر

اول من استقبلنى كان
why me
شخصية ودودة لأقصى درجة
و كان ترحيبه بى ترحيب اتنين اصدقاء بجد

بعد كده شفت سمراء
بنت مصرية جدعة و كلامها يشدك و كمان ابتسامتها حلوة

بعدين سلمت على ياسمين
و اللى فعلا شخصية تأسرك و تجبرك على إحترامها
و اللى سابت فى أثر عميق بعد ما اتعرفت بيها

طول ما انا قاعدة
كنت سامعة ناس عمالة تقول ايمن.. يا ايمن .. يا ايمااااان
قلت اكيد ده raspoutine
احد الشخصيات اللى فعلا تشرفت بمعرفتها امبارح
و هو كان الراعى الرسمى للتصوير
(الصور طلعت حلوة جدا يا ايمن... شكرا ليك)ا

بعدين من حسن حظى لقيت كرسى فاضى جنب وينكى
قعدنا نتكلم كأننا نعرف بعض من زمان
و بجد حسيت قد ايه عقلها سابق سنها بكتيييير

و جنب وينكى كان قاعد ابراهيم و معاه ابراهيم
انسان كوميدى من الدرجة الأولى و وشه بشوش
ساخر بشكل كبير و تعليقاته قوية
(شكله ابراهيم هو اللى دبر اللقاء التالت ده عشان يسوق كتابه... يلا مش مشكلة, الكتاب طلع يستاهل)ا

بعدين لقيت ياسمين بتسأل على كراسة الحضور و الغياب
فا قالولها لسه ماجاش
و حبة كدة لقيت ظيطة جاية من بعدين
و واحد عمال يجرى و بيقول انا هنااااااا
عرفت بقى ان ده ايهاب
شخصية محبوبة من الجميع
و هو اللى كان ماسك الحضور و الغياب

اللقاء ضم ناس كتيييير مقارنة باللقاء اللى قبله
و لظروف المواصلات و الذى منه اضطريت امشى بدرى
فمقدرتش اتعرف على كل اللى قاعدين
بس ده مايمنعش انى شفت ناس كتيييير كانوا بالنسبالى افتراضيين لحد وقت قريب
و اللى كنت سعيدة جدا انى على الأقل شفتهم زى
عمرو احمد
بيشوى the alien
هانى جورج
أ/احمد شقير
شادى فايد
الدبور
مايكل محسن
محمد عادل
سفاح كرموز
محمد رشاد
الفنان الأستاذ/حسنى سليمان
احمد المصرى

بجد مفيش كلام يوصف فرحتى بحضورى المناسبة دى
و احب اوجه شكر خاص لرامى
اللى لولاه ماكنتش حضرت اللقاء

لى بس ملحوظة اخيرة
ياريت يكون اللقاء بعد كده من 4 مثلا
عشان الناس اللى ظروفهم زى حلاتى

عموما
انا كان نفسى اقول كلام كتييير و اقعد مع ناس كتيييير
بس معلش
المرة الجاية تكون احسن
و فى انتظار اللقاء الرابع

هناك ٢٢ تعليقًا:

smraa alnil يقول...

لالالالالالالالالالالالالالالالالالالالالالالالالالالالالالا


اني اعترض ثم اشجب ثم اتنحي

هزلت
اخس عليكي يا نادين

بقي انا اللي كنت كل شوية اسالك مدونتك اسمها ايه تنسيني كدة
تجيبي سيرة ايلاري
وتنسيني
عاااااااااااا

هههههههههههه
يا بنتي انتي والله كنتي منورة اللقاء
وانبسط موووووووووووووووت اني شفتك
ولازم اشوفك تاني
هتيجي ساقية اصاوي يوم التلات ولا ايه نظامك
ومش تخافي هبقي انا اول واحدة استقبلك عشان تكتبي عني

karakib يقول...

أنا كمان كنت مبسوط :)

الدبور يقول...

انت كنت موجوده ؟
و الله ما اخدت بالي و لاعرفتك يا نادين ؟و لا حد قالي
يلا حصل خير بقي
كان نفسي اتعرف علي كل الناس اللي في اللقاء بس الظروف بقي
عموما ابقي عدي عليا في المدونه و اقري البوست بتاعي عن اللقاء و منتظر رايك و ان اتفقنا او اختلفنا مفيش مشكله

تحياتي
الدبور

Amr Ahmed يقول...

نادو
انا سعيد جدا بالتعرف عليكي

لكن الحظ ما اسعدنيش اني اتكلم معاكي كتير
لاني عرفت انك موجودة وانتي ماشية خلاص

بس ان شاء الله المرة الجاية

نتعرف اكتر

تحياتي

FATMA يقول...

انا نفسي اكون معاكو
كل لقاء بقول كده انا عارفة بس دايما القاءات بتكون يوم الجمعة وانا يوم الجمعة عندي صعب شوية

Nadine Alfred يقول...

سمرااااا

انساك دا كلام
انساك يا سلام

يا بنتى البوست اللى انت قريتيه ده كان محطوط بالغلط
انا بس كنت بجرب حاجة و عملت publish بالغلط

اقرى البوست الجديد و شوفى انا كاتبة عنك ايه

ولا تزعلى نفسك

بالنسبة لساقية الصاوى
انا لسة مش عارفة حاجة
ابقى بس قوليلى التفاصيل
و هشوف ظروفى

مبسوووطة قوى بمعرفتك يا سمورة
سلام يا قمر

Nadine Alfred يقول...

هانى

بالرغم من انه لم يدر حديث
بس انت شخصية محترمة و جادة تستحق التقدير
و اتشرفت بمعرفتك

Nadine Alfred يقول...

الدبور

انا فعلا كنت موجودة
بس مشيت بدرى
على 8 كده
معلش
المرة الجاية تتظبط اكتر انشاءالله
سلام ليك يا دبور

Nadine Alfred يقول...

عمرو

انا كمان يا عمرو
مبسوطة انى شفتك
و كان نفسى اقعد معاك
يلا تتعوض المرة الجاية

raspoutine يقول...

نادين

ميرسى على الكلام الجميل ده
بس انا كنت استحق كلام كبير كبير وكتير اكتر من كده
بس مش مهم وما علينا
بس المالجايه عايز بوست ليا لوحدى
ده انا بتعب يا جدعان

نورتينا يا نادين بجد
انتى انسانه حبوبة اوى ودمك بجد خفيف


ايمن فاروق

Nadine Alfred يقول...

عارفة يا توتة

انا برضه كان بالنسبالى الموضوع ده صعب
و بصراحة الحكاية كانت تحدى
تحديت نفسى انى هقدر احضر
و فعلا كسبت الرهان

المرة الجاية ياريت تبقى معانا

Nadine Alfred يقول...

يا سلام يا جدعااااان

احسن حاجة فى ايمن التواضع
بارك الله فيك يا سيدى

عموما انت تستاهل بوست بحاله
عشان الصور اللى لقطهالنا كانت زى العسل
هحط الصور فى البوست الجاى
و نسيب الحكم للجمهور


مبسوطة قوى بمقابلتك يا ايمن
و صداقتك فعلا مكسب لى
سلااااام

smraa alnil يقول...

ههههههههههههه ظلمتك يا نادين

بس كويس انك جبتي سيرتي شفتي بقي انا طلعت منورة ازاي
ههههههههههههه

ربنا يخليكي يا قمر
بقي انا ابتسامتي حلوة
ربنا يجبر بخاطرك يا بنتي

بس انتي ليه مش قلتي علي مميزاتي الكتير
يعني انا شوية في البلد مثلا
انتو كدة بتهرجوا ومش شايفين شغلكم كويس
تفتكري يعني ان موضوع اللقاء دة كان معمول ليه
اكيد عشان كلكم تكتبوا عني


بصي يا سيتي
في حفلة لفروزن لاف في ساقية لصاوي يوم التلات الساعه 8 وكلنا رايحنها
ااانتي هتروحي؟ظ

إبـراهيم ... يقول...

أولاً سووو ميرسييي ( بدل بكووم) على كلامـك الحلو ده يا نادين ، إنتي كنتي من المفاجآت الحلوة فعلاً ف اللقاء ده ، بس لأن الحلو ما يكملش روحتي بدري !

سعدنــــــــا بالتعرف عليكي ، وإن شاااء الله نشوفـك على خير دايمًا

في انتظـار بوست برضـك عن كتاب المغامير ، اللي هوا مش كتابي أنا (بس) يعني ، وتحياااااااااتي

أسوور يقول...

نادين الجميلة الرقية

اشكرك على حضورك معانا ومشاركتك

واشكرك كمان على كلماتك الرقيقة

مش هنلتقى من غيرك بعد كدة وتحية لرامى عشان جابك

micheal يقول...

نورتي اللقاء و باذن الله أتمني المره القادمه أقدر اتعرف عليكي أكتر...أنا و الله منت بتنطط كل شويه من مكان للتاني بهدف معرفه أكبر عدد ممكن بس تتعوض المرة الجايه باذن الله
مستنيينك
تحياتي لكي

Nadine Alfred يقول...

سمراء النيل

شفتى بقى كنت ظلمانى ازاى
و انا غلبانة
اهئ اهئ اهئ

و بعدين يا باشا حضرتك من الناس اللى بتعلم فى وجدان الواحد على طول
انساكى ازاااااى؟؟؟؟

Nadine Alfred يقول...

ابراهيم

فعلا اتبسطت و تشرفت بالتعرف عليك
و برغم انى ماكنتش اعرفك قبل كده
بس انت شخصية بسيطة و جميلة جدا
و احلى حاجة هو جو المرح اللى بتخلقه حواليك

Nadine Alfred يقول...

ياسمين

الشكر لازم يكون ليكى
بجد اللقاء ده ساب أثر عميق جوايا
و كنت هخسر كتير لو ماكنتش جيت

Nadine Alfred يقول...

micheal

merciiii lik
انشاءالله المرة الجاية يكون فيه فرصه
كمان انشاءالله المرة الجاية الظروف تسمح و اقعد للآخر

شكرا ليك يا مايكل
و على فكرة
اول مرة خالص كنت اسمع فيها عن حكاية اللقاء دى كان فى بوست على مدونتك

فبجد بتشكرلك جداااااا

Unknown يقول...

نادين ازيك
انا بجد مبسوووووووط جدااااااا انى شفتك و بجد حسيت انى عارفك من زمان بس اتايضت منك جداً علشان مشيتى بدرى و ملحقناش نقعد معاكى بس المهم انك جيتى و يا ريت بجد تيجى المره الجايه و نقعد معاكى وقت اطووووول لانى قبل ما اشوفوك كنت معجب بالمدونه لكن دلوقتى بقيت معجب بالمدونه و صاحبتها
و كمان يا ريت تسلميلى على رامى و ساره و على فكره انا كنت حاسس انهم مش مبسوطين

يمكن علشان اللقاء كان زحمه شويه و مش منظم بس اكيد هتتعوض المره الجايه و يا ريت تبقى تجيبيهم معاكى

و اخيراً انا بضم صوتى لصوتك و باشكر رامى لانه كان السبب انه عرفنا عليكى و قدرتى تيجى


تحياتى يا صديقتى العزيزه و اسف على التاخير فى التعليق

Nadine Alfred يقول...

why me

بجد كان غصب عنى
كان لازم امشى بدرى لظروف خارج إرادتى
و كفاية انى اصلا كنت ماشية زعلانة عشان هسيبكوا

اما بخصوص رامى و "سالى" هما ماكانوش متضايقين ولا حاجة
بس هى الفكرة انى جبتهم كده على غفلة
فاكانوا مستغربين الجو مش اكتر

عموما كلى أمل فى اللقاء الجاى
يكون احلى من اللى فات
و شكرا ليييك جداااااا يا ايلارى
مبسوطة جدا انى شفتك
اشوفك فى اللقاء الجاى
سلام