السبت، ١٦ يونيو ٢٠٠٧

حالة وحدة

ابحث فى داخلى
عن شرنقة
خيوطها من حديد
محكمة الغلق
تحتوينى
و اعيش فيها
كدودة هادئة مسالة مستسلمة
و اصبح مجرد كائن حى يعيش فى شرنقة مثبتة على غصن ذابل الأورلق
دودة فى شرنقة بلا عنوان
بلا إسم
و بلا هوية
منسية
ناسية العالم من حولها
بما فيه من صخب و ضجيج
و مساحات شاسعة ليس لها مكان فيه
تعيش فى شرنقة مهملة فى مكان عال
ل يطالها من الضجيج شئ
مستمتعة بهدوء و وحدة و سكينة
دودة تعيش فى مملكة
يراها العالم مجرد شرنقة

هناك ١٦ تعليقًا:

basma saghir يقول...

بصي بقى ياستي حلو شعور السلام والسكينة الي انتي مصوراه ده...بس يانادو انتي نسيتي حاجة مهمة ان الدودة الي جوة الشرنقة دي مش هتفضل دودة على طول في يوم من الايام هتبقى فراشة وهتضتطر انها تواجه العلم بحلوه مره وبضجيجه وبخيره وبشره..وللزم هيجي يوم تواجه الناس لان دي سنة الحياة وربنا عايز الدنيا كدة

محدش يقدر يهرب على طولل من مشاكله ولو الحال كدة مكنش حد غلب يختي :)

Amr Ahmed يقول...

لو كنص ادبي فهو جميل جدا

لكن لو حالة

يبقي كده مش لطيف خالص

محدش بيقدر يتقوقع داخل نفسه طول عمره

حلوة يتقوقع دي كانت في علم النفخ

The Alien يقول...

كتير لحتاج سكون وهدوء
كتير ببقي عايز أبعد
وساعات بعمل دا وبيكون مفيد
بس مينفعش يستمر

كاتباها حلو
تحياتي

micheal يقول...

ساعات الواحد بيبقي نفسه في كده لما يتخنق من كل شيء في الدنيا..أتمني متكونيش في المرحله دي
تحياتي لكي

غير معرف يقول...

سلام عليكي يا نادين

يمكن فعلا الدودة محتاجة انها تبعد شوية
عن قسوة الدنيا ...يمكن ضيعفة انها تحمل مصاعب الحياه و مشاكلها في الوقت الحالي
و يمكن من اهل الدنيا دي حد مقدرش يقدر ضعفها
...
بس الشرنقة اللي هتدخلي جواها مجرد مرحلة ...مش نهاية ابدا
و طول فترة غياب.. طويلة كانت او قصيرة
العالم كله وقتها هيكون منتظر حاجة جديدة .ضيف جديد عليها
فراشة جميلة تخرج للحياه من تاني بابتسامة و الوان تنور الدنيا كلها
متزعليش من اي حاجة في الدنيا دي يا نادين لانها ااقل من انها تكون سبب في زعلك
ابتسمي رغم اي شي و ادعي ربنا انه يكون معاكي في الوقت ده و في كل وقت
طمنيني عليكي
:)

سلام
مها

Nadine Alfred يقول...

بيسوو

عندك حق انا مانسيتش ان آخر الدودة هتبقى فراشة
بس الدودة عشان تتحول لفراشة جميلة حرة لازم تعيش فى الشرنقة
هى مش هروب قد ماهى مرحلة مهمة عشان تطلع منها كائن اقوى

عموما هى فترة و كنت بمر فيها حسيت إنى عايزة انسحب من كل حاجة
و عادى بقى
-------
عمور

حلوة يتقوقع دى :P
ربنا يخليلنا علم النفس
صحيح عملت فيه ايييييه؟

Nadine Alfred يقول...

alien

اهوانا نفسى اخد فترة راحة من كل حاجة
بدورلى على سفرية غالبا هتكون إسكندرية
اهو الواحد يشحن و يرجع يستأنف الحياة
------
مايكل

الحقيقة ماكدبش عليك يا مايكل
انا فعلا فى المرحلة دى
كل ما فى الموضوع
إنى عايزة اخد إجازة
شكرا ليك و لسؤالك

Nadine Alfred يقول...

مها

ششكرا ليكى قوى على كلامك اللى كله أمل و تشجيع
و اوعدك انى ابتسم رغم اى شئ
و شكرا ليكى انك افتكرتينى مع انى قصرت معاكى كتييييير

سلامى لكِ
و للجميع

غير معرف يقول...

hello nado
a7'bark e w a7'bar emt7anatk ana a7'ern a7'dt bra2a
el e7sas ely 3ndk da bysadf nas kter w ana mnhom bs ll2sf 3omrk ma 7ate2dary twsaly ll7alh dy w fy nfs el wa2t 3omr da ma 7y7l ay 7aga
shdy 7elk w tmasky w waghy ay 7aga mdy2aky
fy 7agat fy el donia 7elwa el doda m7taga enha t7'rog mn el sharna2a 3shan tshofha :)
some one

momken يقول...

جميل الكلام وجميل طلبك للسكينه والروقان بس هل انتى متاكده ان الدوده سعيده جوة الشرنقه هل هى قريره العين
لو كنتى متاكد فانا اسالك فى شرنقه لى ايضا
انا على يقين ان الدود لا تتحمل وقت اطول فى الشرنقه وتعتبر الشرنقه كيان مؤقت تعود بعده للتحدى وللمصابره وللعناد وللتضحيه وللاعطاء
كل هذه الاشياء ليست موجوده فى الشرنقه

اتمنى سرعه خروجك من الشرنقه
تدوينه حلوة اوى
تحياتى

الطائر الحزين يقول...

من داخل الشرنقة نجنى الحرير
وتطير اجمل الفراشات

3abdo me7tas يقول...

إحساسك جميل بس بيسو بكرة هتبقى فراشة وانا بقول فعلا ان الفترة دى لازم يكون فيها هذوء تام عشان صاحب النصيب ييجى يشيل بقى :) وربنا يوفقك
آه صحيح مفيش شرنقة جنبك فاضية اصل مخنوق الايام دى شوية :) سلام

Unknown يقول...

يا عينى منتهى الهدوء والسلام و لكن هيه فين الشرانق دلوقتى دى بقت صعب جداً العثور على شرنقه حتى بقت اصعب من الحصول على شقه

انا مش بهزر
ان الواحد يقدر يتشرنق فى وقتنا ده و ينسى الدنيا بكل مافيها دى بقت حاجه صعبه اوى
كنت زمان بقدر اعملها دلوقتى لاااااااااا للاسف لأ

يا رب اعرف اتشرنق تانى


تحياتى يا صديقتى
و لو عرفتى مكان شرنقه فاضيه تبقى تقوليلى

حسن ارابيسك يقول...

حلوة القصيدة
لكن مش حلوة فكرة الشرنقة دي
لماذا الإنغلاق والعزلة لماذا دائما نهرب ولا نستطيع فكرة المواجهة ولا أقول التأقلم بل المواجهة باحتفاظك بكل عالمك الذي تحبينه ولا تتخلين عنه


أتمنى تشريفك لي في مدونتي

هاتنور بزيارتك ليها

دعوة لزيارة مدونة شاعر تستحق الزيارة

http://mosaiiic.blogspot.com/

Nadine Alfred يقول...

someone

ازيييييييك يا بنتى
عاملة ايه؟
هى كانت حالة كده و عدت الحمدالله
الواحد بيجيله اوقات معنوياته تبقى فوق و اوقات تبقى تحت
عادى
انت عاملة ايه؟
--------
momken

عجبنى قوى تعبيرك ان الشرنقة دى كيان مؤقت
شكرا ليك مرورك و تعليقك
شرفتنى :)
--------
الطائر الحزين

صح جدا
تحياتى

Nadine Alfred يقول...

3abdo me7tas

ههههههه
مانا لو كنت لقيت شرنقة ماكانش ده بقى حالى
اهلا بيك دايما فى بيتى اللى على قده
نورت المطرح
--------
why me

ليك عندى اول ما الاقى شرنقة فى مكان كويس ايجار جديد...هديلك كلاكس

شرفتنى يا صديقى العزيز
--------
حسن ارابيسك

هى فعلا فكرة مش لطيفة
انك بيقى نفسك تنسحب من الدنيا كده
بس هى الفكرة انه اوقات الواحد بيبقى مش قادر يكمل
او زى ما بيقولوا كده...محتاج يشحن
عشان كده انا كنت عايزة شرنقة
اشحن فيها هدوء و صفاء ذهن
و اعود تانى

و بالنسبة لمدونتك
اكيد هزورها و شكرا جدااا انك جيت مخصوص و قلتلى

سلامى ليك