الثلاثاء، ٢٢ يناير ٢٠٠٨

ذلك الرجل الرائع

مممممممم
لا اراديا اصبحت الذكريات القديمة العتيقة تطفو على سطح تفكيرى
اعتقد انها محاولة من العقل الباطن لتجسيد صورة ابى الراحل امامى مرة اخرى
هكذا اذا
يرحل الناس ولا تبقى سوى الذكريات التى لا تسعفنا عندما نشتاق لحضن لمن رحل

اقول ايه ولا ايه عن ايامنا الهنية معاه؟

1) ابويا كانت دايما اجازته سبت و حد
و كان زمان و احنا صغيرين ياخدنا يفسحنا فى اماكن مميزة
اذكر فى يوم كان فى فيلم تسجيلى فى التلفزيون عن برج القاهرة
اتفرجنا عليه انا و اخواتى و عجبنا قوى
كانت عجبانا فكرة انك تحاول تشوف بيتك من النضارة المعظمة اللى فى البرج
الاسبوع اللى بعده كان اخدنا للبرج
و مع ان فكرة الخروج مع تلات عفاريت مقاريض فى ابتدائى كانت فكرة مرهقة جدا خاصة للرجال
بس هو عملها
و زورنا البرج
و كمان اتصورنا احنا الاربعة فى كل شبر فى البرج
كان من اجمل ايام حياتى اللى لسة فاكراها لحد دلوقتى


2) حوالى سنة 1996 جت لامى فرصة للسفر لفرنسا فى رحلة
و فى نفس الوقت ده كان ابويا رايح فى شغل لبلطيم
صعب عليه تضيع منها السفرية
قالها سافرى انت و انا هتصرف
و قد كان
سافرت هى فرنسا و سافر هو بلطيم
و اخدنا معاه
و بحسبة بسيطة كده نلاقى تقريبا ان فى الوقت ده كنا بنلعب فى سن 6-9 سنين كده
يعنى برضه عيال عفاريت مقاريض مش وقتهم خالص وسط الشغل
بس هو كان بيوفق بين الاتنين و كان بيستفيد من قدراتنا
يعنى مثلا كان فى مرة رايح يشترى ادوات للبيت اللى بيجهزوه تبع الشغل
فبدل ما ياخد معاه 3 عمال اخد 2 و اخدنا معاه
و خلانا نشيل معاهم الحاجات الخفيفة
و احنا كنا بنبقى مبسوطين قوى انه لينا لازمة فى المكان
نظام عبده المهم
و هناك اقدر اقول اننا قضينا احلى مصيف
و اتدلعنا اخر دلع
ده كان حتى باخدنا كل يوم نأجر عجل حاجة بتاعت ساعتين كده ناحية البحر
و طبعا الايس كيرم اللى من عالعربية ده كان اساسى
كنا بناكله من ورا امى ... فرصة بقى ماهى مسافرة

الله يرحمك يابويا... انسان عمره ما هيتعوض
-------------------------------------------
شكرا لكل من مر وعزانى
بجد حسيت ان لى اخوات كتير
ربنا يخليكوا لى كلكم
بس ياريت جميعا تدعوله
انتوا اه ماتعرفوهوش
بس بجد كان انسان اكتر من رائع
ملحوظة تانية
اللى عدا من هنا قبل كده هيلاقى ان كل البوستات القديمة اتشالت
وحاليا اصبحت المدونة مهداة الى روح ابى
مؤقتا لحد ما اتعايش مع الحدث
و شكرا للجميع