حالة وحدة

ابحث فى داخلى
عن شرنقة
خيوطها من حديد
محكمة الغلق
تحتوينى
و اعيش فيها
كدودة هادئة مسالة مستسلمة
و اصبح مجرد كائن حى يعيش فى شرنقة مثبتة على غصن ذابل الأورلق
دودة فى شرنقة بلا عنوان
بلا إسم
و بلا هوية
منسية
ناسية العالم من حولها
بما فيه من صخب و ضجيج
و مساحات شاسعة ليس لها مكان فيه
تعيش فى شرنقة مهملة فى مكان عال
ل يطالها من الضجيج شئ
مستمتعة بهدوء و وحدة و سكينة
دودة تعيش فى مملكة
يراها العالم مجرد شرنقة

شر لابد منه

إستعنا عالشقا بالله
و هنبتدى خناقات... قصدى إمتحانات من الحد اللى جاى
أمانة عليكوا يا جميع الزائرين
العاملين منكم و الدارسين
ياللى عدى عالتعليم الجامعى الحكومى و لسة عايش
إدعولى
لأ
إدعوا للطلبة الغلابة
إدعوا لإخوانكم فى الأسر
البشرية المعذبة فى السجون الحكومية اللى كان إسمها الجامعات سابقا
ناخد برأة او حتى إفراج
أى حااااجة
بس نخلص على خير


هحاول أخش الكهف و ألم نفسى و أذاكر عدل
عشان دعواتكم تجيب مفعول
مانا لازم اجى على نفسى و احاول افهم المنهج بيتكلم عن ايه

يلا
معلش
مسيرى اطلع من عنق الزجاجة
وفى يوم من الأيام اخلص جامعة
و ابقى فرحة امى و ابويا
عاطلة قد الدنياااااا
نياهاهاااااااااااااااااااااااااااااا

تحياتى للجميع

إستعنا عالشقا بالله
و هبتدى إمتحانات من الأسبوع الجاى
إدعوا لى ياخوانا
انا و كل اللى زيى من بائسى المصير المحكوم عليهم فى الجامعات الحكومية
نعدى على خير
و ناخد إفراج
ياااااااااااااااا رب

مافيش اسهل من كده

عاوز تموت شهيد ؟
ياتركب طياره............... ياتركب عباره

عاوز تموت م الجوع ؟
ياتشترى شقه................ياتشترى عربيه بالقسط

عاوز تموت م الحسره ؟
ياتتفرج ع الفاترينات فى ستى ستارز.....ياتروح زياره لمارينا

عاوز تموت م الغيظ ؟
ياتتفرج ع القنوات المحليه......... ياتتفرج ع النشره الجويه

عاوز تموت م الزهق ؟
ياتستنى الأشاره لما تفتح .... ياتستنى دورك فى الطابور فى
التأمين الصحى

عاوز تموت م الهبل ؟
يا تخش ع النت .......... ياتسمع نجوم الأف أم

عاوز تموت مخنوق ؟
ياتروح مصلحه حكوميه ......... ياتقرا الجريده اليومية

عاوز تموت مفروووس ؟
ياتركب تاكسى ............ ياتركب دش

عاوز تموت مرعوووووب ؟

ياتستنى نتيجه الثانويه العامه ....... ياتستنى نتيجه التحاليل عند الدكتور

عاوز تموت مشهور ؟

ياتتجوز رقاصه ............ ياتنصب على بنك

عاوز تموت مليونير ؟

ياتعمل فيديو كليب............. ياتلعب كوره

عاوز تموت ورا الشمس ؟
ياتشغل مخك ............ ياتفتح بؤك

عاوز تموت منكد ؟
ياترشح نفسك فى الأنتخابات ....... ياتخش ف أتفاقيه الجات

عاوز تموت م الحزن ؟
ياتفكر دايما ف أحوالك .......... ياتحط الحكومه ف بالك

عاوز تموت م الضحك ؟
ياتتجوز أتنين ......... ياتشتغل مع المجانين

عاوز تموت ف حالك ؟

أعمل نفسك دايما مش واخد بالك
-----------------------
تحديث نسيت اكتبه فى البوست
الكلام ده منقول من ميل وصلنى و عجبنى قوى

ميه مقطوعة

انا مبسوطة
حقيقى مبسوطة
هطير من الإمبساط
حد يسألنى ليه
اقولكوا ليه
عشان ربنا ادانى حكومة مالهاش زى
فاكرينى بتريق
لا والله بتكلم جد
ده انا هدعيلهم
اله ياااارب تدى الصحة لظيفة هو و اسديكائه الأنتيخ اللى معاه فى الوزارة
برضه مش مصدقيننى
طب انا هحكيلكوا الحكاية و انتوا احكموا بنفسكم

امبارح الميه اتقطعت
ببساطة شديدة جيت الصبح اول ما صحيت افتح الحنفية لقيتها مش راضية تنزل حتى سرسوب
فضلت قاعدة منتظرة بحسرة يمكن نقطة تنزل كده و لا كده
أبداااااااااا
ابزولولتى
و ادينا اهه يوم السبت و برضه مفيش ميه
يعنى بحسبة بسيطة كده نقدر نقول انى داخلة على ال48 ساعة منغير ميه
طبعا كلكوا مستغربين ايه علاقة الكلام اللى فى اول الموضوع بحوار المية المقطوعة
اقولكوا
حكاية قطع المية دى عملية مقصودة و محسوبة بدقة كمان
و انما تنم عن تفكير ثاقب و رؤية مستقبلية واضحة و تخطيط تكتيكى متمكن من قبل الحكومة
و حياتكوا عندى ما بتريق
ياخوانا فتحوا عينيكم شوية عالحقيقة
اهه انتوا يا مصريين كده
تبصوا على نص الكباية الفاضى و ماتبصوش عالمليان
الحكومة كان ليها هدف معين وراء قطع المياه عن منطقة كاملة و اللى اتشرف بالسكن فيها
الحكومة (اله يا رب يخليها لينا) كانت عايزة تمرنا على حياة الصحرا
إفرض كده مثلا و انت ماشى فى امان الله تهت لاسمح الله و لقيت نفسك خير اللهم اجعله خير فى صحرا
تقدر تقوللى هتعمل ايه حضرتك؟؟
هتتصرف ازاى؟؟؟
خصوصا و انت حياتك كلها رفاهية و ترف و عمال تبعتر فى المية يمين و شمال
و كل شوية تستحمى و تغسل هدومك و تهدر فى المية بالشكل الفزيع ده
تقدر تقولى و انت انسان فافى كده لو تهت فى صحرا هتعمل ايه؟
طبعا مش عارف
و ده نتيجة التسيب و اللامبالاه اللى إحنا عايشينها
عشان كده ماما الحكومة قررت تقطع عنا الميه عشان نتعلم ننشف شوية و نواجه المواقف الصعبة دى و يوم ما نقع فى ضيقة ندعيلها بدل ما ندعى عليها
شفتوا بقى قلب الأم؟؟؟
كمان
الحكومة كان ليها هدف تانى أسمى كمان وراء قطع الميه
مثلا
قوللى
انت فى العادى
لو خالتك او عمتك ساكنة بعيد عنك... معدل زيارتك ليها بيبقى كام مرة فى السنة.؟؟؟؟
بلاااااش
كام مرة فى الشهر؟؟؟
اللى انتوا ماتعرفوهوش بقى
ان لو الميه اتقطعت عندك فى البيت
زى ماهى مقطوعة عندنا كده
هتبقى مضطر تنزل تزور قرايبك كلهم
و ده كان احد اهداف الحكومة برضه
إعادة إحياء الروابط و العلاقات العائلية اللى اندثرت برضه نتيجة الرفاهية التى يرفل فيها المواطن المصرى
واحد بيسأل ايه اللى جاب الزيارات فى موضوعنا
اقولك يا سيدى
تقدر تقوللى لو عندك جامعة و عايز تنزل و حاسس نفسك ريحتك مش ولابد هتعمل ايه؟
ماهو مالهاش غير حل من اتنين
يا تنزل الجامعة بالبرفان الطبيعى اللى انت حاطه
يا تيجى على نفسك و تضربلك مشوار لعمتك اللى ساكنة فى النصف الآخر من الكرة الأرضية عشان تسلك أمورك و تأجر الحمام عندها
و بكده تكون اتعلمت درس كبيييييير جدا انك لازم تقوى الروابط العائلية
و ماتخليش النعيم اللى انت عايش فيه ده يبعدك عن اهلك

اما بقى عن الهدف التالت اللى
فهو انك تتعود تتعايش تحت اى ظروف
يعنى مثلا
تخيل معايا كده
لو الميه اتقطعت فجأة من البيت
هيترتب على ده ايييييييييه؟؟
طبعا اول حاجة مفيش حمام
مفيش أكل
مفيش هدوم نضيفة
مفيش غسيل
بمعنى أدق هيصيب البيت شلل تام لكل مظاهر الحياة
و انت بقى استغل الفرصه دى
و حاول تطبيق الهدف اللى الحكومة كانت عايزاك تجربه
عيش كأنك مش عايش
و تعايش مع الوضع اللى مافيهوش عيشة ده
يعنى البس التيشرت اليتيمة اللى فى الدولاب
و خليك بالبنطلون اللى كان عالحبل يادوب دقايق قبل إطلاق التجربة
و انزل دورلك على مطعم تاكل منه
ده إذا لقيت اصلا محلات ولا حتى افران شغاله حيث ان الميه مقطوعه عن المنطقى كلها
و بهذا الشكل
هتطبق مثل الحاجة ام الإختراع
و هتلاقى نفسك كده الأفكار عمالة تنهمر على نافوخك
و تصبح من المبتكرين و المخترعين
و كل ده عشان انت ولد مطيع بتسمع كلام الحكومة اللى دايما عايزة مصلحتك


أعتقد بعد ما شرحتلكوا الوضع كلكم بتحسدونى على التجربة المثيرة اللى خصت بها الحكومة منطقتى العزيزة
بس احب اطمنكوا
كل واحد هيعيش اليومين دول
كله بالدور
و تجربة المية المقطوعة سيتم تطبيقها فى جميع ربوع مصر قبل حلول عام 2010
و على الراغبين فى تكرار التجربة التقدم بطلب الى أونكل ظيفة بعد تقديم ما يثبت خضوعه لجميع الظروفة
و خلوه من أمراض الجرب و القمل و الذى منه

اسيبكم بقى عشان رايحة زيارة لخالتى اللى فى الفيوم

إعتذار

أولا بتأسف جداااااااااااا لكل من مر من هنا و لم يجد جديد
و بشكر كل من سأل عنى

معلش بقالى فترة غايبة لظروف الدراسة و الإمتحانات و تقديم المشروعات و الذى منه

كمان
بصراحة يعنى
بقيت كل ما ادخل البلوج يجيلى إكتئاب
يعنى الخلفية المستردة دى و البنى فى البيج بقى شكلهم على بعض مش عاطفى بالمرة
و بقيت حاسة إن البلوج ده عامل زى البيت الصغير اللى ماليان كركبة
بيت زى ده لازم اوضبه قبل ما اقعد فيه

و بقالى فترة بدور على تمبلت مناسبة للمكان
عشان اتعلم اعمل تمبلت بنفسىxml و css و وصل بى الحال انى احمل كتب من على النت عشان اتعلم ال
يعنى الحكاية فتحت فتوحة جامدة مالهاش آخر
خصوصا و انا ابيض يا فل فى التصميم و الكلام ده
يعنى عاملة زى بتوع نحو الأمية
(ياريت يا جدعان اللى عنده معلومتين حلوين كده مايبخلش بيهم علينا)

عموما
إنشاءالله فى القريب العاجل هيتم التجديد و التوضيب
و هرجع اعمل دوشة فى المنطقة
(مش ناسية يا ابراهيم البوست اللى ليك فى ذمتى عن اول مواليد مجموعة مغامير الادبية
و مش ناسية يا بيسو التاج اللى عايز مخمخة و روقان بال)

اه صحيح
سلام مخصوص ليك يا راسبوتين و ليك يا بيشوى
شكرا ليكم عالسؤال
و اشوفكم قريب
سلامى للجميييييييييييييييييييع

مصدومة

خبر صغير نشر فى آخر صفحة فى المصرى اليوم بتاريخ 07-3-26
الخبر ببساطة بيقول التالى:

عمال المعاش المبكر فى الترسانة البحرية يحتجون على إهذار حقوقهم بتأييد التعديلات

«٢٥٠» من عمال المعاش المبكر البالغ عددهم «٣٥٠٠»، نظموا تظاهرة أمس أمام مبني الترسانة البحرية في الإسكندرية، احتجاجاً علي عدم تنفيذ حكم هيئة التحكيم، رقم ٣ لسنة ٢٠٠١ عمال، كلي من محكمة استئناف الإسكندرية بأحقيتهم في ضم العلاوات المقررة، واحتساب المقابل النقدي لبدل طبيعة العمل، منسوباً إلي أجورهم الأساسية بعد زيادة هذه العلاوات المضمومة منذ ١/١١/١٩٩٢، وفي الوقت ذاته، رفع المتظاهرون لافتات تأييد للتعديلات الدستورية.

يقول عثمان حواش عامل بورشة (١): إن رئيس مجلس الإدارة طعن علي الحكم بالنقض برقم ٢٢١٣/٢٣٥٣ لوقف تنفيذ الحكم بصفة مستعجلة، ولم ينفذ من الحكم إلا «العشر».
......

العجيب في الأمر أن المتظاهرين رفعوا لافتات تؤيد التعديلات الدستورية الجديدة، بدلاً من اللافتات التي تعبر عن مطالبهم، التي تظاهروا من أجلها.

------------

و على كده انتهى الخبر

بقدر ماهو بقى عادى جدا اننا نشوف عمال بيتظاهروا عشان ياخدوا على حقوقهم

بقدر ما أفزعتنى الطريقة اللى تظاهر بيها عمال الترسانة

للأسف ماقدرش الومهم

و بالرغم من إنه بقى عادى انك تسمع ان الحزب الوطنى بيدى خدمات و مكافئات للى يسمع الكلام

بس التصريح بالخضوع و الخنوع بالشكل الفج ده عشان بس الواحد ياخد حقوقه ده اللى مصيبة

و اعتقد انه هتظهر كثير من المظاهرات المؤيدة لناس عايزة تاخد حقوقها

و برضه مانقدرش نلومهم

و زى ما بيشوى قال

"الشعب المصري كله مزنوق ف أول درجة من درجات الهرم
يعني كله بيدور علي الأكل واللبس والسكن
كله مزنوق ومحدش عارف يطلع لفوق
الوضع ده مقصود ومجاش بالصدفة"

و ده حقيقى

بس للأسف

دى لوزة مقشرة يهديها الشعب للنظام الحاكم

مستعدين نعمل اى حاجة و نوافق على كل طلباتكم

بس أدونا حقوقنا اله ما يوقعكم فى ضيقة

خلص الكلام.

إستفتاء

ميعاد الإستفتاء على التعديلات الدستورية هيكون يوم 26/3/07
طب ممكن سؤال؟
هل المفروض اننا نروح الإستفتاء و نرفض التعديلات
ولا نقاطع الإستفتاء من اساسه؟؟؟
ايهم اجدى؟؟؟؟؟

مجرد رأى... عن الفيلم الإسرائيلى

بصراحة انا كنت واخدة فترة كده اجازة من التدوين
بس حبيت النهاردة اقول رأيى فى موضوع مهم

من فترة ليست ببعيدة اثير موضوع الفيلم اللى عرضته إسرائيل, و اللى فيه مشاهد لتعذيب أسرى حرب مصريين بعد حرب اكتوبر 73
و طبعا صاحب عرض هذا الفيلم كثير من صرخات الغضب و الحنق فى "الشارع المصرى" و ليست الحكومة المصرية
بل ان الثورة على إسرائيل و على بن اليعازر كانت معها ثورة و غضب على الحكومة ذاتها
طب ناخد الموضوع من الأول
دلوقتى إسرائيل هى اللى عرضت الفيلم, بمعنى آخر المجرم فضح نفسه
طب هى عملت كده ليييييه؟ و اشمعنى اليومين دول بالذات؟؟؟
الفترة اللى اتعرض فيها الفيلم اتميزت بأحداث كتيرة مهمة
منها
1- حرب إسرائيل فى لبنان, و فشلها المزرى امام الشعب و الإرادة اللبنانية
2- الإنتهاكات و التخريب فى المسجد الأقصى, واللى بسببه كثير من الهيئات وقفت ضدها فى مصر و العالم

كمان مش لازم نغفل حاجة مهمة جدا
و هو إن على مدار تاريخ مصر, و تاريخ ما تعرضت له من إساءات من بعض الدول
فرد مصر بيكون واحد و مكرر فى جميع المواقف
نقعد نزعق, و نلاقى وزير يقول هنبحث فى الموضوع ده, و مش هنقبل المساس بسمعة المصريين , و مش هنسكت... و كلام كتير كده
و هوباااااااااااااااا
الموضوع ينام
و يبقى مجرد إضافة جديدة فى ليستة الإهانات فى شهادة مصر

ممكن تكون إسرائيل عايزة تستغل النقطة دى, تقوم تذيع الشريط عشان توقعنا فى الشرك
و هى عارفة فى الآخر اننا مش هنعمل حاجة
بس هى هتكون اثبتت لنفسها انها برضه الأقوى, و الأشرس

يمكن كمان تكون بتلهينا
و محضرة لنا مفاجئة قريب

أى إن كان السبب
طبعا دماء الجنود و تمن ارواحهم لا غبار عليها
و أكيد الفيلم لازم ناخده بجدية اكبر من كده
بس برضه لازم نفهم ايه اللى ورا الفيلم
إسرائيل دولة ماكرة, مش بتعمل الحاجة كده و السلام
و أحنا كمان محتاجين تكون مواقفنا اكثر رجولة و حزم
و نحترم انفسنا عشان يحترمنا الآخرون


عموما ده رأيى الشخصى
يحتمل الصحة و الخطأ
اضغط هنا

فى كافيه الإبداع... و قعدة ماتتعوضش

ياااااااااااااااااااااااااااه
اخيرا شفتهم
و على قد ما كنت خايفة
متوترة
و محرجة من انى اجى
بس بعد كده
فرحت بالناس اللى قابلتهم
و ناس كتير منهم كنت اعرفهم من خلال التدوينات
عرفتهم على الطبيعة
شخصيات من ارقى ما يكون
و بجد كانت قعدة جميييييلة جدا

فى الأول ما كنتش عارفة الكافيه فين
و فضلت الف و ادور
بعدين لمحت لمة كبيرة بعيد
قلت يبقى اكيد هم دول ولاد مصر

اول من استقبلنى كان
why me
شخصية ودودة لأقصى درجة
و كان ترحيبه بى ترحيب اتنين اصدقاء بجد

بعد كده شفت سمراء
بنت مصرية جدعة و كلامها يشدك و كمان ابتسامتها حلوة

بعدين سلمت على ياسمين
و اللى فعلا شخصية تأسرك و تجبرك على إحترامها
و اللى سابت فى أثر عميق بعد ما اتعرفت بيها

طول ما انا قاعدة
كنت سامعة ناس عمالة تقول ايمن.. يا ايمن .. يا ايمااااان
قلت اكيد ده raspoutine
احد الشخصيات اللى فعلا تشرفت بمعرفتها امبارح
و هو كان الراعى الرسمى للتصوير
(الصور طلعت حلوة جدا يا ايمن... شكرا ليك)ا

بعدين من حسن حظى لقيت كرسى فاضى جنب وينكى
قعدنا نتكلم كأننا نعرف بعض من زمان
و بجد حسيت قد ايه عقلها سابق سنها بكتيييير

و جنب وينكى كان قاعد ابراهيم و معاه ابراهيم
انسان كوميدى من الدرجة الأولى و وشه بشوش
ساخر بشكل كبير و تعليقاته قوية
(شكله ابراهيم هو اللى دبر اللقاء التالت ده عشان يسوق كتابه... يلا مش مشكلة, الكتاب طلع يستاهل)ا

بعدين لقيت ياسمين بتسأل على كراسة الحضور و الغياب
فا قالولها لسه ماجاش
و حبة كدة لقيت ظيطة جاية من بعدين
و واحد عمال يجرى و بيقول انا هنااااااا
عرفت بقى ان ده ايهاب
شخصية محبوبة من الجميع
و هو اللى كان ماسك الحضور و الغياب

اللقاء ضم ناس كتيييير مقارنة باللقاء اللى قبله
و لظروف المواصلات و الذى منه اضطريت امشى بدرى
فمقدرتش اتعرف على كل اللى قاعدين
بس ده مايمنعش انى شفت ناس كتيييير كانوا بالنسبالى افتراضيين لحد وقت قريب
و اللى كنت سعيدة جدا انى على الأقل شفتهم زى
عمرو احمد
بيشوى the alien
هانى جورج
أ/احمد شقير
شادى فايد
الدبور
مايكل محسن
محمد عادل
سفاح كرموز
محمد رشاد
الفنان الأستاذ/حسنى سليمان
احمد المصرى

بجد مفيش كلام يوصف فرحتى بحضورى المناسبة دى
و احب اوجه شكر خاص لرامى
اللى لولاه ماكنتش حضرت اللقاء

لى بس ملحوظة اخيرة
ياريت يكون اللقاء بعد كده من 4 مثلا
عشان الناس اللى ظروفهم زى حلاتى

عموما
انا كان نفسى اقول كلام كتييير و اقعد مع ناس كتيييير
بس معلش
المرة الجاية تكون احسن
و فى انتظار اللقاء الرابع